KARAI A SHAMAN CHYEJU HPRING AI WUNPAWNG BU GA
NWANG MUNG SENG TU

HOME

 

Hpraw san tsit tsawm ai hte Karai a shaman chyeju hte hpring ai Wunpawng bu ga rai nga ai. Moi ji wa prat kaw nna Karai Kasang gaw anhte Wunpawng bu ga hpe shaman chyeju jaw nga ai. Hkik hkam tsawm htap ai bu ga hpe Wunpawng sha ni hkam la da saga ai. Tsit tsawm ai jut masum mungdan rai nga ai. Asha dan a dingda, Myen mung a Dingdung, Miwa mung a Sinna Dingsa, Gala mung a sinpraw maga e agrin nga ai bu ga nan rai nga ai. A.D 1 ning kaw na A.D 1928 ning daram du hkra hpan wa Karai a ahkaw ahkang hte ndai jut masum mungdan hpe tinang nan up hkang lai wa sa ga ai.Lamu ga ginra masa hpe yu yu ga. Dingdung maga Nmai hte Mali hka gai ni kaw nna lwi hpang wa ai mali hka nu gaw lawu de Nmau hka hte Meza hka du hkra lwi shaya bu ga a arawng shapraw nga ai. Sinna maga hku nna lwi hkrat wa ai Hugawng hka nu gaw, wunpawng amyu sha ni a ginra hpe garet nhtawm, hpu nau Kadu amyu sha ni a ginra hku nna lwi shaya mat wa ai hpe mu lu ga ai.  Dingdung maga de a shingkang ngan rai nga nga ai Majoi shingra bum a bum galaw mayan gaw Hkakaburazi bum kaw nna dingda de yan rai Patkai, Kumun bum Udi Uga bum ni hte myit mi ahkrum ara rai wunpawng bu ga hpe jawm makawp maga nga ai nrai ni? Bai Sinpraw maga Maru krung, Ngawchang krung hte Gauri krung mayan hku mung tsaw la ai lamu dep hkyen magap bum mayan ni wa wunpawng sha ni a bu ga hpe u kanu gaw u hkai hkalung ni hpe shi a singkaw npu e makawp tawn ai hpa kawan shinggrup nga ma ai.

            Ndai zawn tsit tsawm ai wunpawng bu ga gaw ntsa lam yu yang sha tsawm ai n rai, manu dan ai n htum n ma Ja, Lungseng, Padi Lung hkyeng ni hpe hka shi hka nu hka gai shagu ngu na daram hta htu shaw mai nga ai n rai ni? Dai hta n ga, sau hpring ai lamu ga nan rai nga ai majaw hkai lu hkai sha n mai ai shara mi nnga, shaman chyeju hte hpring la ai lamu ga nan rai nga mali ai. Dai hta n ga, kaga mungdan hkan e n mu lu ai nam du sat ni hte hpring ai ga nan rai nga ai. Mau hpa Indaw nawng ing kaba mung anhte a buga e a manu dan la ai sut gan rai nga ai. Utu chyangau garu ai, u numji numjoi ni pyaw len ai ginra nan rai nga ai. Ndai ginra gaw Maru, Lashi, Atsi, Nung, Rawang, Lisaw, Jinghpaw ngu ai amyu lakung kaba kru myit hkrum myit ra makyit sumri nang ngang hte shanu shingbyi nga ai ginra nan rai nga ai. Karai a chyeju hte sha n rai yang kaning rai nna ndai daram ngwi pyaw ai bu ga hta ya dai ni du lu shanu nga na rai ta?

Wunpawng buga a n shung, ginhtawng hte yinam ta du hkra ladaw kaba masum mung, buga a lamu ga, hpun kawa, du sat yam nga hte shanu shing byi nga ai amyu sha ni hpe aten hte aten n-gun nnan hte matut nna nga pra shangun nga ai nrai i? Nga n pyaw hkra kahtet lai ai, katsi lai ai ngu ai baw ya dai ni du Wunpawng sha ni garai n katut yu ga ai nrai ni? Nshung mangai ten hta mahkup sai wan mawng katsi pyaw nna, yi hkau na mam ni gum wa ai hpe kadai wa shingran n mu ai nga lu na rai ta? Ginhtawng ten, Wunpawng bu ga shara shagu ngu na daram, ja htu magam shachyen shaja ai masha wu wu di di kamawng ai lam ni, yinam ta shang wa ten wa la wangan ni nga uloi hte hkau na galau, nu num hte shayi sha ni hkau na hkai  shamu shamawt ai lam ni gaw, Wunpawng bu ga a tsawm htap lachyum nam nak rawng ai shamu shamawt ai lam ni rai nga ai.

Dai ni Karai shaman ya ai Ja ngai mung a sut ni a majaw anhte Wunpawng bu ga hta Karai a nchyang mayam ni law law hpe shangai shaprat lu na, Nawng Nang chyum jawng, Hanson Chyum jawng, Mo Nyin Chyum jawng, Kuthkai Chyum jawng ni hpe lu hpaw tawng saga ai n rai i? Anhte Wunpawng amyu sha ni Karai jaw tawn ai buga hta jawm shanu nga ai kaga tara maigan ni ht sumtsan de sasana madan jat wa lu ai gaw, Wunpawng buga hta Karai a chyeju hte hpring ing nga ai lam a sakse langai ngu yang kadai wa ningdang lu na rai ta?

Ndai zawn manu dan ai bu ga hpe kaga amyu sha ni hku nna yu sharawng ai gaw mara nan rai nga ai. Dai ni ndai daram manu dan ai bu ga hpe lu la tawn ai anhte wunpawng sha ni hta lit kaba ni mung lu nga ga ai. Tsit tsawm ai bu ga ginra, kahtawng ning chyawng, amyu ru sai, du sat yam nga, du sat du myeng, hpun kawa, sut nhprang rai, hpun kawa hpe rem kyem makawp maga na gaw anhte a lit nan rai nga ai. Karai a shaman chyeju hte hpring ing ai bu ga hpe shatsawm jahtap na mung anhte a lit rai nga ai. Dai zawn re ai shaman chyeju hte anhte hpe shaman ya ai Karai Wa hpe kabu aw law daw jau nga na mung anhte Wunpawng amyu sha ni a lit kaba rai nga ai hpe n malap ga ngu ga hpungdim dat nngai law.