Make your own free website on Tripod.com

MUNGGA

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

 

MUNGGA

 

“ Katsi katsang akrin ayang rai nna matse rai garu ai mali banda e, Shi e mu la wu ai; shi hpe makawp kawan, lahku lamai da ai hte Tinang myu sha hpe pawn maga wu ai..”

Lai sai jaw prat ni hta Wunpawng sha ni asak hkrung ai madang hpe sumru yu ga. Bum, maling hte yi ni hpe sha machyu let asak hkrung lai wa saga ai. Laika nlu, lu da ai shan hpyi laika hpe pyi manu n sawn ai sha kan si ai majaw ju sha kau ai hpe na yu saga ai. Nat jahtung ni a nsin n pu e hkrit let jaw jau lai wa saga ai. Hpaji hparat n lu sut mung nsu, labau hta masat sakse n nga ai n gup maumwi hte sha pra lai wa saga ai. Rai tim, hpan Karai gaw, Israela myu masha ni hpe zawn, Wunpawng sha ni hpe matse labye hte garu ai mali banda e, Hkristu a sai hte mari hkye la let tam la sai. Myi di na hpang rai naw nga nga yang sasana sara ni hku n na, hpu htum ai Mungga hte nan tam mawai la sai. ‘Masha kasha gaw mat mat ai ni hpe, hkan tam nna hkye hkrang la na du sa ai…’(Lk.19:10). Israela hpe Hkanan du hkra makawp ai zawn, anhte hpe mung htani htana lahpum hte lahku pawn ba la sai.

1927 ning Dr. Ola Hanson kaw nna Karai a Mungga hpe Wunpawng sha ni hpe shaman dagam ga hte ap ya sai. Mungga hta manoi yang arawng lu baw tai ai amyu byin na Mungga hpe shingdu dat yang, htum mat ai amyu tai wa na shadum sai. “Yehowa hpe nawku ai a myu hte, Sali wunli matu lata la ai bawsang gaw, a nga ai.” (Shk.33:11. Karai a lakawn ai lam ni Wunpawng prat ladaw kadun hta sakse amyu myu hku mu lu sai.

1877 a hpang kaw nna English Asuya prat e, hpyen shang ai Wunpawng sha ni nga hpang sai. Magrau grang ai ningbaw ni paw pru wa sai. Karai a magam gun kaja ni hpe mung Karai jaw ya sai. Mungkan majan prat English Levi hte US 101 hpyen hpung ni hta magrau grang ai hte English, American ni hta n yawm ai sari sadang marai atsam dat let shang lawm wa sai. Dai ni du English, American myu ni shagrau chyeju dum nga ma ai. Myu kaba ni hte hku hkau li ai majaw hpaji hparat lu, myi hpaw wa ga ai. Hti hkum nlaw tim hkrit hkungga ma ai. Mungdaw masat shagrau ai hpe pyi hkrum lu sai. 1948 a hpang kaw nna gaw, Kachin Rifle hpaw nna, shara shagu du hkawm wa, sasana galaw, lit magam lam shagu hta maigan myu masha ni pyi masat hkungga ai myu tai wa hkra kangka ai hte share shagan myit jasat madun lai wa sai.

1960 hpang daw de mung, share shagan ningbaw ningla ni hpe shangai shapraw ya let amyu a sari hpe matut makawp lai wa sai. Manu daw n lu ai lamu ga hta galaw lu galaw sha lai wa shangun sai. Du sat yam nga, hpun kawa, nhprang rai hkum sumhpa hpe madu lu na ahkang jaw lai wa sai. N dai zawn rawt jat wa ai gaw anhte atsam a majaw nrai. Maigan myu masha ni daram mung myi hpaw hpaji kung ai ni nrai ga tim, Hkristu a marang e, Karai a myi sha tai ai amyu byin tai wa ai majaw ndai zawn rawt jat wa saga ai.

Ji wa ni Mungga hta manoi ai majaw ladaw shagu hta masha e hkungga ai shagrau hkam ai myu tai shajang masai. Myit mada shara n nga mat hkra shagrit n hkrum kaya n hkrum sari sadang n sum, jahpoi kau ai mung n hkrum ma ai. Arawng she lu ma ai. Mung daw jarit, htung hkying, laili laika ni hte hkrak rai wa saga ai.

Chyurum Wunpawng sha ni e, dai ni na anhte a prat madang, nga sat nga sa lam hte ahkaw ahkang lam ni hpe bai maram yu ga. Ji wa ni prat hta hpaji grau chye ai ni, myi hpaw sut su kung zet wa ai ni law wa sai kun? Grau jat wa ai teng yang, moi na hta grau n na galu kaba wa na ang ai. Dai zawn nga mu nga mai shaman hkrum na malai, ahkaw ahkang lam ni hta ginlut mat wa saga ai kun? ngu ai hpe sung sung myit yu ra sai. “Anhte gaw, tinang hkan ai lam hpe sagawn yu nna, Yehowa hpang de nhtang wa saga.”(Sharung.3:10).

Karai a makawp kawan da ai chyeju shangwang kaw na, shinggan de n tawt lai mat ai sha Madu hta manoi let, Mungga hta kaji kawa ni ni zawn matut manoi nga ga. “Shanhte prat lai hkra hkan wa sai lailen ningli hpe myit sumru yu nna, shan the a hpun da hkap hkra, hkan sharau nga mu..” (Heb.13:7) Karai  Kasang gaw anhte hpe dai ni du hkra Mungga hte Kasha shingtai Yesu hku nna, shagrau shatsaw na matu tam nga ai tsaw ra ai hpu nau ni e.

 

mgshanan@yahoo.com