Make your own free website on Tripod.com

SHINGBYI LUNGHKRUNG

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

SHINGBYI LUNGHKRUNG

Karai Kasang gaw anhte a shingbyi shara hte n-gun rai nga ai, ru tsang ai ten e karum na jin nga chyalu rai nga ai. Dai majaw ginding aga galai mat wa nna, nammukdara kaang na bum ni awam nga ti mung; Hka leng ni wung nga nna kanawng nga ai hte, Dai ni rawt hta ai majaw, bum ni ashun nga ti mung, anhte nhkrit ga ai"...( Shakawn. 46:1-3)

N myit htang da ai 2004 ning a Hkristmas hpang shani hta, Tsunami hka hpungla hkaleng kaba a majaw, masha mun, sen kahtap n na, Southeast Asia mungdan rai nga ai Indonesia, Malaysia, India, Srilinka etc, ni hta, tsinyam kaba hkrum let si ru shajang mat ai lam hpe anhte yawng chye da lu saga ai. TV shiga ni hta mu mada lu ai gaw, n gun ja dik ai hkaleng kaba ni e, dum nta sutgan hte masha sen hku nna shanu nga ai mare ni de, kamyat kaput shang sa wa nna, hka hpungla n'gun kaba hte, masha mun sen ni hpe, hka panglai nammukdara de, kamyet woi bang mat wa ai. Malawng maga dai zawn re ai tsinyam kaba hpe, htang da ai lam n nga ai. Mare, kahtawng hte nawng hkaleng a n pu e atsai awai mat mat wa sai. Nkau mi tsaw ai nta n gaw n tsa ni hta, rawt hprawng lung nna, mada magra mai ai hpun, shadaw lama ma ni hta noi tek lu ai majawsha, asak lawt lu ma ai. N'gun a tsam gawng kya wa sai sak kung ni hte, ma kaji malawng gaw, lama ma hta magra noi n na, garawt woi wa ai hkaleng ni hpe n lu ninghkap ai majaw panglai de kaput si nna, asak sum shajang mat ai. Anhte shinggyim masha ni a sak hkrung lam gaw n grin la nga ai. Anhte a asak gaw hka mawru, hka hpungla, hte tsin yam ni hta n sum mat ti mung, aten ladaw du ai nhtoi hta kadai mung n pat hkum da lu ai sha, sum mat wa na sha rai nga ai. Dai rai yang anhte asak hpe, gara hku bau sin la lu na kun ngu ai hpe sung sung myit yu ra wa sai.

N dai mungkan hta sak naw hkrung nga yang, ndai Tsunami zawn re ai, kaga tsinyam tsindam law law ni hpe mung, hkrum hkra lu nga ga ai. Tsinyam tsindam lawt lu ai shara ndai mungkan ntsa hta n nga shi ai. Karai a Mungga hta bai yu yu ga: ..."masha a n htoi ni ladaw da ya nna, Shi nga lu ai shata ni hpe nang hti matsing da sai hte, shi nlai lu ai aten nang san da ndai... (Yoba.14:5-6). Anhte a asak hpe anhte gara ladat hte rai ti mung, rem kyem da lu na hpaji, atsam, ladat ni hpe anhte grai n tam la lu shi ga ai. Ga de ru jaw dat ai hka ntsin hpe, bai n lu shabai la lu ai zawn, anhte a asak hpe mung, si htum mat wa yang, anhte n chye mawai la ga ai...." Anhte chyawm gaw si chyalu ni rai ga ai: ga e ru kau sai hpe, bai n sagawt la lu ai n tsin hte bung mat saga ai...

(2 Samuela 14:14). Anhte mungkan ga hta sak hkrung nga yang, ndai hkumhkrang, myit masin hta pu ba let, hkawm sa nga ra ga ai. Galoi ten hta hpa byin na mung anhte n chye da lu ga ai. ..."shinggyim masha gaw, aprat gadun nna, ru yak ai hte hpring nga ai. Nampan zawn shi pu wa nna, dan kau hkrum nga ai; Shingna zawn shi lai wa nna, grin wa lu ai n rai..." (Yoba 14:2). Dai asak hpe bau sin na matu shani shana sadi maja let, shakut shaja hkawm sa nga ga ai. "... na a asak sum wa magang ai lam hpe myit ru nga na rin dai: shani shana myit gari nga let, na a asak prawn na nprawn na lam myit ung ang nga na rin dai..." ( Tara Jahprang 28:66).

Anhte a asak wenyi hpe hkrang shaw la lu na htingrai htingra ja ngu ai manu mung anhte n lu ga ai. Lama mi lu madu da ai rai ti mung, anhte dai asak wenyi hpe anhte mari hkrang shaw la lu na matut manu nhpring nga ai. "...kadai mung tinang a kanau wa hpe hkrang la lu na nrai, shi a matu htingrai htingrat ja Karai Kasang hpe jaw lu na n nrai. Shanhte a gawng malai jahpu kaba nga nna, Prat dingsa e nlaw hkraw nga malu ai"... (Shkawn.49:8-9). Anhte a n gun, atsam, nyan hpaji hparat, sutgan ni hte, hkan sa ai makam, htung tara ni hte, anhte a asak wenyi hpe anhte hkrang mawai la lu na lam n nga sai majaw, Hkristu ngu ai Lunghkrung hta asak a Shingbyi Lunghkrung Wahpang hpe shara hpe Karai wa e hpaw da ya sai. ..." dai Lunghkrung gaw Hkristu rai nga ai..." ( I korinhtu 10:4). Lunghkrung ngu ai Madu Yesu Hkristu hta anhte a sak wenyi hpe kyem da let, shim ai lam hpe hpaw da ya sai. Dai Madu Yesu ngu ai Lunghkrung hta, anhte a n'kung n'kyang, gawngkya ai sakhkrung lam ni hpe yin la hkam la let, kam hpa manoi ai myit masin hte, shamyet shingbyi shang wa ra nga ga ai. Anhte langai hpra gaw Karai a man hta gawng kya yubak kap ni tai let Karai a hpyen ni naw tai nga yang, Hkrtistu Yesu gaw, Pungkum kawng a wudang hta, yubak a dagam dala rai nga ai, si-hkrung-si-htan hpe shi asak hte wa hkam ya nna anhte hpe kye mawai la sai. ..."Anhte naw gawng kya nga yang...anhte yubak kap ai ni naw rai nga yang... anhte hpyen ni naw rai nga yang, shi a kasha a si hkam ai majaw anhte Karai Kasang hte htinglu htinglai hkam la ngut jang...anhte hkye hkrang la ai grau nna hkrum na ga ai (Roma. 5: 6-10). Dai majaw dai asak wenyi a shingbyi Lunghkrung rai nga ai Madu Yesu Hkristu hta, anhte a nbyin ntai ai sak hkrung lam ni hpe ap nna, shamyat shingbyi wa ai rai yang, anhte a wenyi asak gaw Karai a lata hta shim nga ai hte shim ai lam lu la nga ai. Anhte a hkum shan hte seng ai daw ni hten run htenza mat wa lu ti mung, anhte a sak wenyi gaw htani-htana shim ai hte, myit mu myit hkut lu shajang na rai saga ai. Madu Yesu a ga sadi hpe anhte myit mu myit hkut hkam la let Madu hpang de sit shang sa wa ga. "...ngai shanhte hpe n htum n wai asak jaw da we ai rai nna, shanhte galoi mung hten bya ai hkrum na nrai; nye a lata na shahte hpe gade e mung kashun la ya lu na nrai..." ( Yawhan. 10:28). Ndai Hkristu hta lu la ai Shingbyi shara gaw n dai mungkan a hkaleng mawru ni hta grau nga ai hte, shim la nga ai, hten run mat na lam galoi mung n nga ai. ..."Kaning rai nme law, nanhe si mat ai ni rai nga myit dai rai nna, nanhte a asak gaw Karai Kasang hta kyem da nga ai..."( Kolose. 3:3).

Ndai n grin ai mungkan sak hkrung mahkrun lam hta, Madu Yesu gaw, shi hta shamyat shanat ai ni yawng a Shingbyi Lunghkrung rai nga ai majaw, dai Madu Yesu hta shalan shabran ai, n gunban ai hpe tut e ,hkam la lu nga ai. Dai majaw Tsunami hta grau ai Madu Yesu hta sit shang shingbyi ra nga ga ai. " Yehowa e, hkanu ni hte hkashi ni, Nsen shapraw nga ma ai: Hkanu ni kadu kashaw nga ma ai. Hka sumhpa ni ngoi kaba ai hte, Nammukdara a ngun ja ai hkaleng ni hta, Tsaw htum ai shara de nga ai Yehowa gaw n-gun grau kaba nga ai ( Shakawn.93:3-4). Mungkan a mawru, hkaleng ni kade ngoi kaba ti mung, dai asak a Lunghkrung hta shamyat shanat nga ga ai majaw, ndai mungkan a hkaleng ni hpe, anhte dang manga lu na hpe myit mu myit hkut let gwi gwi sakhkrung hkawm sa nga ga. Kamsham myit hte dai asak Lunghkrung hta shingbyi nga ga.

"Ngai hpang de sa wa wa hpe mung, kaja wa ngai n kanawng kau na n ngai"...

(Yohan.6:37)

"Madu a mying nag hpe shaga ai masha kadai mung, hkye hkrang la ai kaw du lu na ra ai" (Roma.10:13)

"...Shingbyi shingwung shara de hprawng wa ai ni ngu ai, anhte a matu mara, ngang ngang kang kang re ai shalan shabran lam rai nga ai.." (Hebre. 6:18)

BACK