Make your own free website on Tripod.com

SHAKAWN KUNGDAWN AI SAKHKRUNG LAM

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

SHAKAWN KUNGDAWN AI SAKHKRUNG LAM

" Ngai asak hkrung nga ai hte yang... Ngai naw agrin nga yang, Nye a Karai Kasang hpe ngai kungdawn nga na nngai.." (Shakawn 146: 2-3)

Dai rainna Karai Kasang a mying ningsang kajai tsun hkai nga ai n-gup n-gau a asi ngu ai shakawn kungdawn hkungga hpe, anhte Yesu a gawp e, Karai kasang kaw tut nawg e nawng ya ga..." ( Hebre 13:15).

Karai hpe anhte aten ladaw shagu hta, lam magup sum hpa a matu chyeju dum mai nga ai.

..."N sim nsa kyu hpyi nga mu; lam shagu hta shakawn kungdawn nga mu..."Htesaloni 5:17). 'Lam shagu hta shakawn kungdawn nga mu,' ngu tsun ai hta, nga mu nga mai,myit mu myit dik ai ten ni hpe sha tsun ai nrai; yakhkak jamjau ai lam, ru yak ai lam, hkrap myiprwi, ju shingna, etc. ni mung lawm nga ai.

Kasa Pawlu gaw sakhkrung lam a jahtum ten hta rai tim,kadai e mung gare kashun la kau nlu ai, Karai a simsa ai hte, hkrum mahkrum ni hta myit dik myit pyaw let, kabu gara let Karai hpe daw jau nga ai. Mungga hpe hti yu ai shaloi , ..."Dai madu hta tut nawng e kabu gara nga mu...Hpalam hta mung myit hkum ru myit hkum yak myit...tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu...(Hpilipi 4:-4-13).

Dai rai yang anhte dai ni na Hkristan ni mung, Karai hpe aten ladaw shagu hta, lam magup sum hpa a matu chyeju dum mai nga ai. Laksan n gup aga hte nawku jawng hta chyeju shakawn ai hpe chyu sha, kungdawn ai lam ngu ai nrai. Karai Kasang a ahkaw ahkang hte, naw sak hkrung nga ai hte yang, tinang tsap nga ai shara hta, hkrum kadup wa ai mabyin, masa ni hta, Karai tsawra ai arawn lailen, kasi kamang ni hpe ten shagu hta kangka ai hte, sakse tai si si shadan shaleng dan ra nga ga ai. Yosep gaw maigan Egatu mayam tai nga ti mung, htawng kata e sharen da ai hkrum ai rai tim, kangka sadi dung ai hte, agung alau hta mi rai rai, jam jau ai lam hta mi rai rai, Karai a dinghpring ai a si hpe shadan shaleng dan lai wa sai. Shani shagu na sakhkrung lam hta, hpa hkrum hpahkra wa ai rai tim, Karai Kasang ra sharawng awng ai arawn lailen kasi kaja ni hpe, tatut bu hpun dagraw da lu ai gaw, kraw kata na makam masham a asi mung rai nga ai.

Dai makam masham a asi hpe hkrung ai shakawn kungdawn hkungga ngu mung matsing la mai nga ai..

Nga mu nga mai hkrum let awng dang lu wa ai rai yang mung, gumrawng gumtawng n nga ai sha, shagrit shanyem let hkawm sa mai nga ai. Shani shagu na kanawn mazum hkawm sa ai sak hkrung lam ni hta, Karai a ding hpring ai, tara hkungga ai, kam sham ai, tsawra ai, shakut sharang ai hte sumnung ai myit ni hpe anhte dinghkrai hta, tatut shadan shaleng dan lu ai lam gaw, tatut kungdawn dawjau ai lam nan rai nga sai. (Roma. 12:10-21;1 Timoti.6:11; 2 Kor.2:16). Anhte a asak, sutgan, arawng sadang hpung shingkang ni gaw gaw grin ai lam n nga ai. Nampu nampan zawn shi aten hta pu nna, shi a aten hta run hkrat mat ai hpe dum sumru yu let, tatut a sakhkrung lam hta nan sak jaw kungdawn nga ga.