Make your own free website on Tripod.com

SHANI SHAGU A MAGAM LIT

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

SHANI SHAGU A MAGAM LIT

"Dai Madu a lata na, sali wunli ngu ai shabrai hpe nanhte nhtang hkam la na chye ga myit dai majaw, hpa galaw yang mung, masha a matu galaw ai zawn nrai, dai Madu a matu zawn galaw nga nna, myit masin yawng hte a shaja nga mu: dai Madu Yesu kaw nanhte yam nga myit dai..." ( Kolose 3: 23-25)

Hkristan shagu a kaba la ai lit gaw Karai a arawng sadang hpe, jum, nhtoi tai let shadan shadawng ai lam rai nga ai. Karai a magam hpe laksan aten la nna aten, masa htap htuk manu yang she, ap nawng gun hpai mai na re ngu hkam la chye ga ai. Shani shagu na kan bau magam bungli hpe Wenyi lam hte n seng ai shing nrai mungkan hkum shan a magam bungli madang langai hta sha tawn da chye ga ai.

Anhte yawng Karai a magam hpe, shani shagu gun hpai ra nga ai hpe Mungga hta matsun da nga ai. ..."Nanhte hpa lam galaw yang myit mung, mung sumtu hta rai ti mung, magam bungli hta rai ti mung, Madu Yesu a mying nsang hpe gang let, yawng mayawng hte hpe a galaw nga nna, shi a marang e Kawa Karai hpe shakawn kungdan nga mu"... ( Kolose 3:17). Karai a myiman hte Karai a hpung shingkang hpe tau let, Karai a arawn lailen, hpraw nsam atsam ningja ni hpe, man ang ai kan bau magam bungli lit ni hte, sak hkrung lam ni hta, kangka ai hte sakse, nhtoi tai ai lam ni gaw, Karai a magam hpe ta tut gun hpai ai lam majing rai nga ai.

Mungkan a lailen, masa htung gaw, tinang a akyu hpe madung da nga ai. 'Nye a matu akyu n pru na rai yang, ngai hpa hpe mung n galaw na', ngu hkam la chye ga ai. Shi kaja yang she ngai kaja na, shi tsaw yang she ngai mung bai tsawra na ngu ai myit jasat hpe mahtang madung da let hkawm sa chye ga ai. Dai zawn hkam la da nga ai n dai mungkan hta, Karai a kashu kasha rai nga ai anhte hpe matsun da ai gaw, ..."N dai mungkan ga a myit nhkan dagraw ai sha, Karai Kasang a mai kaja ai, sharawng ai hte hkum tsup re ai myit mang lam hpe anhte chye ginhka lu myit ga..." (Roma 12:1-3). Shani shagu na man ang ai kan bau bungli ni hta, Karai a nhtoi sakse hti hkum tai wa lu na matu shagrit shanem ai myit masin hpe bu hpun dagraw let, Karai a hpaji hte, kyu hpyi ap nawng nna, shakut shaja ra nga ai. Shani shagu na sak hkrung lam hta hkrum kadup wa ai mabyin masa ni hta mung, Karai a sakse kasi kaja tai lu na matu, Karai a nyan hpaji hpe hpyi let hparan hpajang chye ra saga ai.

Daniela gaw shi a magam bungli hpe kangka sadi sahka hte gunhpai lai wa sai majaw, maigan hpara naw ai hkawhkam wa pyi, Karai Kasang hpe mu mada wa let, Karai hpe shakawn shagrau wa sai. Nehemi gaw maigan hkawhkam wa a sabyi jau magam bungli hpe, kangka sadi sahka ai hte gun hpai ai marang e, run agrawp mat sai Yerusalem mare kaba a bunghku ni hpe bai gaw gap shangut la na matu ahkaw ahkang hpe, up hkang nga ai maigan hpyen asuya a lata kaw nna hkam la lu sai. Hkawhkam jan Eshta gaw magrau grang myit masin hte, Karai hta kam hpa let, tinang a myu hpe n nyet kau ai sha, si ru hkrum mat na matu masat da sai shi a myusha Israela hpe hkye mawai lai wa sai.

Anhte a shani shagu na sakhkrung lam gaw, Karai a matu hkrung nga ai lam sha rai nga ai hpe a dum let ap nawng nga ga (Roma.14:7-8).