Make your own free website on Tripod.com

HPUNGGAW KAW DU NGA NDAI KUN?

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA
 

HPUNGGAW KAW DU NGA NDAI KUN?

Manang wa e, na magam bungli hpe nang myit n dik nga nni? Shing n rai, dai bungli gaw nang hpe ja gumhpraw sha lu wa shangun n htawm, htani htana asak hkrun lam kaw nna kahprai wa shangun ai zawn rai wa ai majaw, nang myit ru nga ai kun? Kanu kawa makyin jinghku ni hpe karum shingtau ra nga ai a majaw kaning re ai magam bungli hpe lata galaw ra na hpe she myit yak nga ai aten rai kun? Ya nang hpunggaw kaw du nga sai.

Na a matu ahkyak ga san gaw: NGAI HPA BAW GALAW RA NA TA? NGAI GARA MAGA DE LAGAW LAHKAM HTAWT RA NA TA?

Nang bungli nau kyin nna gara mahtang gaw na a matu kaja dik rai na hpe myit chyai na a ten n nga na re. Rai tim, kyin ai lam hpe jahpai nna hkrup mara rai daw dan ai lam hpe hkum galaw. Karai Wa hpe hkrit hkungga ai Shi a n-chyang mayam ni a kasi la ga. Dai gaw: laksan aten la n htawm lusha gam nna kyu hpyi ai lam re.

Madu Yesu pyi Shi a sasana magam hpe hpang maw ai shaloi nhtoi mali shi ya lusha gam kyu hpyi ai (Mahte 4:1-11). Bai nna, shi a sape shi lahkawng hpe lata la na mahka e shana tup akyu hpyi ai (Luka 6:12 ).

Shawng de India mung dan e sasana sa galaw ai sara kaba Wesley Duewel gaw shi a sasana magam bungli hta ten tup grai kyin ai wa re. Shi hpa tsun a ta? Kyin a lam ni a jaw e myit mang daw dan ai lam ni hta Karai wa hpe madung n tawn mat wa ai zawn re ai hpe ngai dum hprang wa ai a majaw, laksan akyu hpyi ten (prayer retreat ) hpe jahkring hkring galaw nngai  da. Dai kyu hpyi ten hta shi gaw chyum laika n law htum daw 50 ram hpe hti wu ai da. Dai zawn lak san aten la kyu hpyi ai shaloi, Karai wa gaw ngai hpe law law lang kaja dik ai hku lam madun la ai nga shi sak se hkam. (Let God Guide You Daily [Grand Rapids: Zondervan Publishing House, 1988 ], 77 ).

Hkawhkam laika langai 19: 11-18 hta mung, Chyoi pra Wenyi gaw Elia hpe nam mali de Hereb bum du hkra woi sa mat wa n htawm, nhtoi mali shi ya, Karai wa a n-sen hte lam matsun madun ai hpe hkam la shangun ai hpe anhte mu chye lu ai.  

Chyum laika anhte hpe tsun sharin ai gaw, chyaru hkum nang mu Wenyi hte mahtang hpring nga mu da (Ehpesu 5:1). Chyaru nang hkra gaw chyaru hpe law law lu yang mai byin ai hpe anhte chye ga ai. Wenyi hte hpring ai ngu ai gaw hpa rai ta? Tinang a myit ra ai hku n rai, Wenyi a myit ra ai, Shi a hkang ai hku hkan nang ai lam re. Galati 3:2 hta tsun ai gaw, Wenyi hpe anhte makam masham hku nna lu la nga ai. Hkristu hpe tinang a hkye la Madu hku nna kam sham ai wa hta dai Chyoi pra ai Wenyi shanu nga ai. Mai sa, dai Wenyi a myit ra sharawng ai lam hpe gara hku chye lu na rai ta? Chyoi pra ai Wenyi e shung nna ka tawn ai Karai a MUNG GA/CHYUM LAIKA hti ai hku nna sha chye mai nga ai. Karai a mungga/chyum laika hpe grau chye na hkra aten jaw let n hti sawk sagawn ding sa gaw Chyoi pra ai wenyi hte hpring zup na matu n mai byin nga ai. Dai majaw, lak san lusha gam kyu hpyi aten la ai ngu ai hta chyum laika hti ai lam galaw ai mung a hkyak nga ai.

Lama wa anhte Wenyi hte hpring tsup yang gaw, anhte a myit masin hkum hkrang bawnu laswi lasa ni yawng gaw Karai Wa a lam woi ai hpe grau chye ginhka nna sak hkrung chye na rai nga ai. Rai tim, anhte law malawng gaw, kalang lang anhte pyi n chye kau dat ai sha, kaja dik ai hku lam woi matsun madun la chye ai, dai Chyoi pra ai Wenyi hte grau hpring tsup na matu madung n tawn ga ai. Dai hku n byin hkra sadi nga ga.

Manang wa e, Chyoi pra ai Wenyi gaw anhte a matu a hkyak dik rai nga ai. Chyum laika gaw Karai wa a lam madun sharin ai ga nan rai nga ai majaw (II Timohti 2: 16-17) dai hpe kam sham myit majing hte law law hti nna hkan nang hkan sa nga yang gaw Chyoi pra Wenyi hte anhte hpring tsup nga ai majaw anhte a sak hkrung ai lam ni gaw Chyoi pra Wenyi shi nan lam woi la ai hku rai na re.

Nang hpunggaw kaw du nga nna, Chyoi pra ai Wenyi nang hpe shawng de lahkam garai n htawt shangun shi ai rai yang mung hpa hkum tin. Laksan lu sha gam nna chyum laika hti kyu hpyi re ai sim sa ten hpe madaw la nna myit galu ai hte Karai wa nang hpe matsun madun la na hpe she la u. Kam ushing rai yang Karai wa gaw nang hte rau rai nna (2 Korinhtu 6: 16-17) na a lam ni kaja dik ai hku byin wa na ra ai.      (WASHAWNG BRANG)