Make your own free website on Tripod.com

NAW TAM LA RA AI SUTGAN

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA
.
 NAW TAM LA RA AI SUTGAN

Shingyim masha gaw reng htum dik ai sut nhprang ni hpe manu jahpu hte arang kaba shaw nna tam akrawk la chye nga ai. Myit mada ai sut nhprang pru ai buga gara hta nga ai hpe shawng tam la let, nyan hpaji atsam ni hpe arang dat n lu n da, n yup n sha shakut sharang sut nhprang ni a hpang de hkan nang chye ga ai.

Anhta a dai daw buga Jinghpaw mung gaw manu dan dik ai hpun kawa, sut nhprang ni ngai ai buga majing rai nga ai. De majaw anhte Jinghpaw myu sha ni gaw kajai gumhkawng ai myu tai yu saga ai. Jinghpaw gaw lungseng, lungseng gaw Jinhgpaw ngu na daram pyi maigan masha ni yu sharawng manu shadan lai wa saga ai re. Manu dan la ai maisak mailung hpun kawa ni hpe mung madu lu let kabu gara hkam la lai wa yu saga ai.

Ja lungseng hte kaga sut nhprang rai ni hpe anhte gara hku tam la lu ai hpe Chyum mungga Yoba a laika hta tau hkrau madi madun nga ai. Dai ni hpe tam la mayu yang ga kata de sung dik ai dumlawng hku hte lungpu ni hpe htu akrawk ga ai. Dat wan  hte gawt hkang ai goigawt goilang lakang ni hpe htan let, lamu ga npu kata a sin mak dik ai shara de yu nna tam ahpre la chye ga ai ( Yoba 28:1- 4).

Yoba 28 hta tsun tawn ai lam ni gaw daini Hpakan ga hta dik tup sai. Kawng nhkun hku nna tsaw dik ai bum ni hpe hpri santeng hte ngun dat htu shaw la ga ai. Ya dai ni na prat ban hta gaw bum kaba ni hpe bawm wan tsi hte shawng kapaw ayai dat nna ga ganaw jak kaba ni hte tam ahpre la rai di nga ai. Dai majaw Hpakant ga na bum ni htu agrawp kau hkrum sai. Bai bum ntsa hta hka hkawng htu nna, hka a n-gun hte nlung ga ni hpe agrut kashin kau let, lungseng ni hpe tam la nga ai. Dai hpe Myaw nga nna tsun shamying da ma ai.  Tsit lali tsawm ai Uru hka hpe madim dim da nna nna hka ni hta e hka kata nlung nhkun hpaw let hka hpunglip nna, nlung kaba ni a npu hta makoi nga ai Lungseng ni hpe tam la nga saga ai.  Madim dim nna hka chyup jak hte hka shahkyet kau nna manu dan ai ja the lungseng ni hpe tam la nga ai. De a marang e moi shawng na hka lwi ai lam ni pyi nhti nhtang shanut mat nna hka ni hkyet kye mat wa magang sai. Malihka a hka hku hkanam ngu na shara shagu hta mung, maigan Company ni sa du nna ja htu jak kaba shadun let ja ni hpe htu akrawk la nga sai hpe dai ni na ten hta mungga hta madu madun ai hte maren mu lu wa aga ai. (Yoba. 28:5-11).

Dai majaw Maw grup yin bum ni krin mat wa magang ai hte Uru hka hte hka shi ni hkawng hkyet mat wa magang sai. Shanu shingbyi ai du sat du myen u numji ni htum magang hpang wa sai. Maigan Company ni nam maling bum shagu du hkawm nna tam akrawk la sai majaw buga na mam ni agrawp htum wa sai. Hpun kawa ni atsai awai krin magang wa sai hte hkrun hkraw kahtet hpang wa sai. 

Mercury (Pada) ni hte ja ni hpe rim mahkawng la ai majaw anhte a hka shi, hka kaba ni mung hkanu mat, maza mala hte hpring mat wa sai. Hpun kawa ni tsai mat sai majaw lamu ga katsi kahtet n ram wa sai, hkrun hkraw ai bum krin ni hkrai hpring mat wa sai , du sat du myeng u numji ni hkkoi mat magang wa sai.  Anhte a lata hta hpa ahkaw ahkang mung n lu mat nna lata kaman sha raimat saga ai.

Dai ja lungseng ni hpe tam mu la ai majaw anhte hpe akyu mung grai jaw lai wa sai. Rai ti mung, gumhpraw sut nhprang gaw anhte myu sha langai wa a asak hpe mari hkrang la mai ai htingrai htingrat ja tai wa lu ai n rai.

Bai, masha gaw ndai mungkan ting hpe madu lu da nna, tinang a asak sum mat a yang gaw, shi a matu hpa akyu nga a ta? Masha gaw hpa gawng malai hkungga hte wa tinang a asak hpe raw la nu na a ta?... nga nna Karai a Mungga hta shadum da nga ai  (Marku. 8:35-36). Anhte a sak gaw dai Jinghpaw mung ting na ja lungseng, sut nhprang hta grau nga ai. Jinghpaw mung ting a Ja Lung seng  sutgan nhprang lu da tim, anhte a hpu nau hte anhte a asak hpe  mari la lu na daram manu dan ai htingrai htingrat ja hpe anhte lu ga ai n rai.

Karai a Mungga hta madun da ai gaw;

Tinang a sutgan hpe kam sham nna, Tinang a ntaw ntsang lu ai hpe shakawn nga ai ni; kadai wa mung tinang a kanau wa hpe hkrang la l una nrai, Shi a matu htingrai ai ja Karai Kasang hpe jaw luna nrai. Shanhte a gawng malai jahpu kaba nga nna, Prat dingsa e nlaw hkraw nga lu ai. ( Shakawn. 49:7-9)

Dai majaw anhte Wunpawng sha ni hpe Karai Kasang gaw Ja lung seng sut nhprang hta grau hpu htum ai sutgan nhprang hpe tam mu madu ai myu byin tai shangun mayu nga ai

Rai ti mung hpaji byeng ya hpe kadai mu lu a ta? Chyechyang a npawt ganang rai nga nta ? ( Yoba.28:12 ).

Dai sut nhprang anhte a n-gun a tsam, sutgan, nyan hpaji, n-gun lagaw hte shakut nna tam la mai ai n rai. Karai Kasang chyu sha de a shara hpe masat da nna kyem da nga ai.

Dai Sut nhprang hpe Hpaji Byeng-ya ngu nna ndai Yoba hta shingteng mying jaw da wu ai. Dai gaw Madu Yesu Hkristu hpe madi madun tsun da ai rai nga ai. Karai Kasang kyem tawn da ai Sali wunli sutgan ni hpe gara hku nna anhte madu la lu ai hpe hpaw hpyan dan na matu du sa ai madu Yesu hpe Hpaji ngu nna Karai a Chyum Mungga hta tsun da nga ai.

Shi (Madu Yesu) gaw anhte a matu mara, Karai Kasang kaw nna, Hpaji Byeng-ya  lam, dinghpring ai lam, shachyoi shapra ai lam, hte htingrai htingrat ai lam, tai wa sai.. ( I Korinhtu. 1: 30).

Ndai Sutgan nhprang hpe anhte tam mahkawng la ra nga ga ai. Dai hta ja gumhpraw sut gan hte galai la n lu ai Asak, Arawng sadang, Sali wunli wungau, ahkaw ahkang hte rawt jat galu kaba na ahkang ni rai nga ai (Ga shagawp.3:13-18) Hpaji Byengya ngu ai dai madu Yesu hta mungkan ga na sutgan ja gumhpraw arawng sadang hte manu daw dan n lu ai Karai a shaman chyeju ni hpring tsup nga ai majaw rai nga ai.

Shingyim masha de a manu n chye nga ai ...Dai hpe ja jet hte galai lu ai nraiUhpira ja jet, reng htum ai unuk lung seng the mung mari la lu ai nraihpaji gaw lung seng hta grau hpu nga ai.ja jet mung marila nlu nga ai ( Yoba.28:13-19).

Dai hpaji Byeng-ya ngu ai madu Yesu hpe anhte a n-gun a tsam, nyan machye machyang, htung tara ladat hte tam la n mai ai. Anhte a myit masin makam masham hte chyu sha tam madu la mai nga ai. 

..anhte mahkra a matu mara shi hpe ap ya ai wa gaw, shi the nawng yawng mayawng anhte hpe jaw na nrai ni? (Roma.8:31).

Karai a Mungga hta madi madun da ai hpe hti yu ga.

Hpaji Byeng-ya mu hkrup ai hte, Chye chyang ai myit lu la ai wa gaw, a nga ai shi a lat hta asaksutgansharawng awng ai lamasak hpun rai nga ai (Ga shagawp28:13-19).  Ngai hpe mu tam ai wa gaw a sak hpe mu lu nna, Yehowa a chyeju hpe mung hkm la nu ai. Ngai hpe shut hpyit ai wa chyawm gaw, tinang a asak wenyi hpe shut kau nu ai; ngai hpe ndawng ai ni yawng, si ai hpe tsawra nga ma ai (Ga shagawp. 8:34-36).

Asak wenyi hte mungkan a Sali wunli ni hpe hkam la lu na matu anhte shawng ningnan Karai hte jinghku hku na ahkyak nga ai. Raitim anhte gaw Karai hte daw hka mat nna, tinang a lam hta tinang myit ra ai hku hkan nang let dam mat wa ai ni mahtang rai mat saga ai. Karai hte jinghku n hku ai sha nhtang hpyen tai wa ni rai ga ai. Karai hpe hkrit gaya ni ni, Karai a lam hta na yen makoi mat ai ni tai mat ga ai. Dai majaw anhte hkrit gaya chye ga ai, myit mada shara nnga mat ai zawn hkam sha chye ga ai, myit ru myit yak hte shoi chyum hkrum ga ai, langai the langai mara n raw lu ga ai, hpyen majan ni waw nna gasat gala ga ai. Dai zawn byin pru shangun ai a npawt nhpang daju gaw yubak mara nan rai nga ai. Dai yubak a majaw Dum nga ninglen hka yawng yawng nga ai hte maren chye ninglen ti nang hkum hpe jahten shaza kau let Karai hpe shut ai ni mung anhte tai nga ga ai. Anhte kadai mung tinang a n hkum n tsup ai sak hkrung lam hte lam amyu myu a majaw mung hkrit kaya ai hte Karai a shangwang kaw nna hprawng mat ai ni ni tai wa sa ga ai.

Anhte yawng sagu zawn lam dam mat saga ai; langai the langai tinang am hkamn mat saga ai: Yehowa chyawm gaw anhte mahkra a yubak mara hpe, shi a nta e mara da nu ai (Esaia.53:6). 

Anhte dinghkrai hte amyu dap shagu mat ai ni hte, dam mat ai ni rai sa ga ai. Anhte yawng gaw yubak galaw ai hte Karai a arawng sadang hpe dumhprut kau ai ni tai sa ga ai (Roma.3: 23). Dai rai nna Karai a man hta tsun na ga hkaw mi mung nnga ai sha Karai Kasang a man e yubak mara hpe lu ai ni rai ga ai hpe yin na lam sha nga mat ai (Roma.3: 10). Rai ti mung anhte hpe Karai hte jinghku hku nna, mahku mara rai let Karai a sali wunli shaman chyeju ni hpe hkam la lu na matu Madu Yesu gaw dai yubak ni hpe shatsai kau ya ai lam hpaw lajang da ya sai.

Karai a man kaw nna mat mat ai ni rai mat ai majaw Karai Kasang mahtang ja lung seng sut nhprang ni hpe tam ai akrawk la ai zawn, anhte shinggyim masha ni hpe tam akrawk mawai la na matu, Hkristu Yesu ndai Mungkan de dat ya sai. 

Masha kasha gaw mat mat ai ni hpe, hkan tam nna hkye hkrang la na du sa ai rai nga ai(Luka.19:10)

Laka ka ai wa a kaji dwi gaw sam mung ga na Jinghpaw mung de nga ai kashu ni hpe wa ja hkrum na matu du sa wa ai. Kashu rai nga ai laika ka ai wa gaw asak kaji ai ma sha rai ti mung gaya n gwi ai majaw, kabu gara hkrum na malai shani tup mali hka a nhkap hkaraw hkan e hprawng makoi rawng yu sai. Kashu a matu kumhpa hpe baw gun let kashu a hpang hkan nang nna, tam ahpum la let nta de du hkra woi wa lai wa yu sai hpe dai ni adum nga ai.

Yubak a reng hkang ai lam a npu e mayam yam let myit mada shara n lu, gawng kaya mat ai ni anhte tai sa ga ai. Karai a hpyen ni anhte tai mat saga ai. Anhte dai zawn rai nga yang Karai Kasang hte htinglu htinglai hkrum lu na matu Madu Yesu wudang hta si hkam sai (Roma 5: 6-11). Anhte a yubak mara mahkra hpe Madu Yesu gaw shi a yubak ngu nna anhte a shara hta malai tsep kawp hkam la wa kau ya sai

Masha law law a matu mara, shi asak hpe gawng malai jahpu shatai yana, nga nna du sa ai (Mk.10: 45).

 Karai the jinghku hku na matu pat shingdang nga ai yubak hpe Hkritsu Yesu atsai awai la kau ya sai. Madu Yesu hta anhte langai hkrai a yubak, amyu dap lakung shagu a yubak hpe Madu Yesu kaw mara da nna Wudang hta anhte matu Shi hpe jeyeng sai. Dai hpe kam sham na ahkyak rai sai. Madu Yesu gaw anhte a yubak hpe, wa kau na matu si hkam let yubak hpe raw dat kau ya sai hpe myit masin hta kam sham nna n-gup hte yin la ai rai yang Karai a kasha tai let hkye hkang la hkrum ai ni tai wa lu sai (Roma10: 9-13). 

Hpakant ga hte Jinghpaw mung ting a sut nhprang rai ni maigan myu sha ni a lata hta hkrat sum mat mat wa ti mung, anhte hta myit mada shara naw nga ai hpe dum ga. Htum mat magang wa ai mungkan a sut nhprang, ahkaw ahkang aya ni hta anhte Wunpawng sha ni a gam maka n nga ai. Karai a lata hta she anhte a myit mada shara mahtai a nga nga ai. 

Anhte hta myit mada shara gaw Madu Yesu ngu ai Hpaji Byengya rai nga ai. Hpaji Byeng-ya madung rai nga ai; dai rai nna hpaji Byen-ya hpe tam la u nga nna anhte hpe matsun nga ai. (Ga Shagawp.4: 7). Matut nna mu lu ai gaw,

Shi a mungdan hte dinghpring ai lam hpe shawng tam nga mu shaloi dai nlang nanhte hpe kahtap jaw marin dai nga nna, Karai a Mungga hta anthe hpe htet da nga ai (Mahte 6:33).

Karai Kasang ding hpraing ai lam hpe lu na matu Karai lajang da ai sagu kasha ngu ai madu Yesu hpe myit masin ht ahkap la kam sham nna n-gup hte yin la na saw shaga ai hpe hkap la ga.  NDai dinghpring ai lam hpe nhte a n-gun a tsam hte tam shakut la mai ai n rai. Myit masin makam masham hte tam la ra saga ai.

Karai a Mungga hpe htep lahti hkan nang madat mara let man ang ai magam bungli shagu hta shakut sa wa yang, Karai Wa e anhte hpe shaman ya na the anhte a lata a magam bungli hpe hkam la let ndai mungkan hta rawt jat galu kaba wa ai myu ni tai wa lu na rai nga ai (Tara. 28; Shak.90: 17).

Ja lung seng hpe lu ai amyu tai ai zawn, Madu Yesu a marang e Karai hpe shagrau shatsaw naw ku daw jau ai Wunpawng myu sha ni anhte tai wa yang gaw, a lu ai hte Karai a shaman chyeju hpe n shut n shai matut nna bai hkam la na rai ga ai.

Bai Karai Kasang e Hkristu hta tam mu la da sai Karai a sutgan mahtang she tai wa na ahkyak dik rai saga ai. Hpakant Uru seng maw ga na hpu reng htum dik ai sut gan ni gaw Karai a sutgan n rai nga ai. Hkrsitu Yesu hta tinang a yubak hpe raw dat kau hkrum nna, makam masham a marang e dinghpring ai lam hpe lu la da sai kam sham kashau kasha shagu gaw, Karai manu daw dan n lu ai Sali wunli rai nga sai.

Yehowa hpe nawku ai amyu the, Sali Wunli a matu lata la ai abaw gaw, a nga ai. (Shakawn .33:12).

Dai karai Kasang hpe anhte myu sha ni ja lung seng sut nhprang hta grau nna manu shadan let myit masin hta manu shadan gali da ai rai yang shaman chyeju hpe bai hkam la lu na rai nga ga ai.

Nye a ga madat let, nye a chyinghka makau e, shani shagu doi yu nga na, nye a chyinghka shadaw makau e ala nga ai wa gaw a lu ai.Ngai hpe mu tam ai wa gaw, asak hpe mu lu nna, Yehowa a chyeju hpe hkam la nu ai. Ngai hpe shut hpyit ai wa chyawm gaw, tinang a asak wenyi hpe shut kau nu ai(Ga shagaw.8:34-36) .

Karai a jinghku tai n na shi hte shani shagu hku hkau hkau chyap nga ra saga ai. Shingrai yang anhte myu sha ni myu htum kye mat nna sum mat na hpe n tsang ra na re. Ahkaw ahkang ni hkrat sum nna mungdan a sut nhprang sut gan ni mat mat wa magang ti mung, anhte Jinghpaw Wunpawng myu sha ni hta myit mada shara naw nga nga ai. Bai pawn ba sharawt la hkrum na ga sadi ni hpe Karai hta lu la nga ai. Ahkaw ahkang ni ginlut hkrat sum magang sai ngu nna mung hkrit kajawng n ra na re.

Anhte yawng Karai hta noi nna jinhku hku, hkau chap nga yang Karai a pawn ba hkrum ai lam hpe mung bai hkam la na re. Karai hta tsep kawp manoi nna myu sha shagu tinang hpe jaw ai atsam hpaji hte magam bungli ni hta shakut sa wa yang, anhte a ahkaw ahkang hte anhte rawt jat galu kaba na lam ni hpe Karai Wa nan lam hpaw ya wa na ra ai. Lawhtam nna mungkan chyam hkra aru ru si si wa na ni mahtang tai wa na ga ai. Karai a ga sadi hpe mu mada let makam masham hta manoi nga ga.

 Ngai Yehowa gaw sun sin ai wa rai nga nngai,; n sim n sa ntsin jaw we ai; kadai n jahten lu hkra shani shana sin na we ai. Nye a n-gun hta hpa nna ngai the jinghku hku nga u ga, rai sa, ngai hte jinghku hku nga u ga...aru jung na ra ai tsit lali n na pu majawm na ra ai mungkan ga hpe nsi nai si the jahpring na mara ai. (Esaia 27: 2-5)

Karai Wa nan anhte myu sha ni hpe sin ai wa tai nga ai. Hpa majaw nga yang Karai gaw anhte hpe pu majawm si si wa hkra sin ai wa hte bau sin ai wa rai nga ai majaw re.

Shi hte hkau chyap nna, ngwi pyaw nga u; Shing rai yang, nga mu nga mai hkrum na ndai" (Yoba.22: 21; Tara jahprang 28, Sharung.3: 40).

Hpaji Byeng-ya ngu ai Madu Yesu hte shani shagu hkau chyap let shi a ga madat nga ga. Karai ra ai sak hkrung lam arawng lai ni hte hkawm sa ga. Karai ra ai hpe mahtang hkan galaw saga. Shingrai yang Karai a pawn ba sharawt ai Karai a chyeju ni the Karai lam madun ai ahkaw ahkang ni hpe anhte hkam la l una rai ga ai. Karai a ga hpe nmadat anhte my sha ni kadai mung kadai ra ai hku hkawm sa yang anhte n ra sharawng ai asi ni hpe mahtang anhte dan la wa na rai ga ai. Ya na ten hta hkrum kadup ai ni mabyin masa ni the kaya kahpa ni a majaw myit daw myit htum n nga ra ai. Karai Kasang ra ai hpe daw jaw ai myu sha ni tai let Karai hpaw ya ai chyinghka shagu hta kabye nan kadai mung kadai man ang ai magam bungli ni hpe shachyen sa wa yang, myit mada ai ahkaw ahkang, sut gan hte ra mara ni hpe mung Karai Kasang da ai aten ladaw hta anhte bai hkam la na rai ga ai.

Shingrai, lakum hpun gaw pu n pu, Tsabyi ru gaw asi nsi, Tsanlun hpun gaw kaman sha tu, Yi hkauna mung nai mam npru; sagu lawng hta sagu hpung kata, Dumsu lawng hta dumsu n pra timung, Ngai Yehowa hta kabu gara nga na nngai; Ngai hpe hkye hkrang la ai Karai Kasang hta sharawng awng nga na nngai (Habaku 3: 17-19)

 Anhte gaw tinang hkan ai lam hpe sagawn yu nna, Yehowa hpang de nhtang wa saga. Sumsing lamu e nga ai Karai Wa hpang de, myit masin hte lata sharawt ga.(Sharung.3: 40-41)

Hkungga Let, La Labya