Make your own free website on Tripod.com

Hkye hkrang la ai lam hte magam bungli

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

HKYE HKRANG LA AI LAM HTE MAGAM BUNGLI

 

"Kaning rai nme law, makam masham a marang e, chyeju hte sha, nanhte hkye hkrang la ai hkrum ma nit dai: dai gaw nanhte kaw na nrai, Karai Kasang a kumhpaw kumhpa sha rai nga ai: kadai mung gumrawng shara nnga u ga, magam bungli kaw na mung rai nga ai nrai. Kaning rai nme law, anhte shi a magam bungli rai nga ga ai; mai kaja ai bungli shachyen na , Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga,Karai Kasang gaw dai ni hpe shawng nnan e lajang tawn da mu ai. [ Ehpesu 2:8-10 ]

Nkau myi hkye hkrang la hkrum na matu Kaja ai bungli galaw ra ai nga ma ai. Hkye hkrang la hkrum na matu she kaja ai bungli galaw nga ai re le nga nna hkam la ai ni law law nga ai hpe mung chye lu ai. Rai tim Karai Kasang a mungga hta dai hku ntsun da ai re. Asak hkrung ai chyum laika a sung htum ai lam ni hpe a tsawm sha akyu hpyi la nna hkam la ra ai re.

Hkye hkrang la ai lam gaw magam bungli kaw na nrai, makam masham a marang e Karai Kasang a chyeju san san sha re, nga nna hti ai chyum laika hta ka da ai re. Dai re majaw hkye hkrang la ai lam hte seng nna galaw ya ai, lajang ya ai wa gaw Karai Kasang sha re. Galaw lajang da ya ai chyeju hpe hkam la na gaw dai ni anhte ( Madu galaw lajang ya ai lam hpe) hkap la kam sham ai ni rai ga ai. Rai ti mung hkye hkrang la ai hta Karai Kasang gaw kaja ai magam bungli shaja na matu mung yaw shada da ai re lam hpe gaw nmai malap ai. Kaja ai bungli a majaw hkye hkrang la hkrum ai n re. Hkye hkrang la ai lam hpe hkap la kam sham nna, hkye hkrang la lu sai ni mahtang kaja ai bungli galaw na matu she Karai Kasang gaw lajang da ai re hpe chye na na ahkyek la nga ai. Karai Kasang matsun ai hku mungga hpe hpachye hpachyang la na grai ahkyek ai re.Dai madu ra ai lam hpa rai nga ai hpe chye ginhka nga mu nga nna [Ehpesu 5:17] hta tsun da ai re.

 No.1 Hkye hkrang la hkrum na matu magam bungli kaja galaw ai n re sha, hkye hkrang la hkrum sai majaw kaja ai magam bungli galaw na awng nga ga ai hpe shawng n nan ginhka let chye na ra na re.

No.2 Hkyehkrang la nhkrum ai sha kade kaja ai galaw rai tim Karai Kasang nsawn ya nga ai. Mahte 7:21 kaw anhte hti yang ndai lam asan sha chye lu ai re. Rai nna myihtoi Amo 5:21-23 kaw hti ai shaloi mung Israela masha ni hkye hkrang la ai teng man ai mungga hpe gaw shanhte ngawn nsawn galaw nna mana maka tingse ni hte sha pyaw ma ai. Nawku daw jau ma ai, Laban ban ma ai, shagu hkungga nawng ma ai. KaraiKasang gara hku tsun a ta “nan hte a tingse sumpyi nsen ni nye na lahpang ai,” nga  tsun ai re . Dai re majaw hkye hkrang la ai lam hpe nlu ai sha kaja ai bungli galaw yang Karai Kasang nsawn ya ai. Hkye hkrang la ai lam gaw bungli hte lu ai mung nre. Galaw da ya sai Karai Kasang lajang ya ai hkye hkrang la ai lam hpe hkap la ai majaw, lu la sai a marang e kaja ai bungli galaw yang Karai Kasang shagrau sha a na lam mu lu ai re.

 

No. 3.  Hkye hkrang la ai hta Karai a yaw shada ai lam gaw kaja ai magma bungli galaw na matu re. Dai majaw hkye hkrang la ai hkrum sai ni gaw kaja ai magam bungli galaw nan galaw ra ai ngu ai hpe Ehpesu 2:10 hta mu lu ai. Hpilipi 2:13 hta mung ndai lam matut nna sang lang da ai re. Lamawa anhte tara shadik nna, shakut shaja nna she hkye hkrang la lu ai baw rai yang, Galati 2:21 hta hpa tsun a ta “Hkristu gaw gaman lila sha si hkam kau nu ai,” nga nna tsun da ai.

Rai yang Hkristu gaw gaman nsi ai. Yesu Hkristu mungkan de du sa ai lam gaw yubak lu ai ni hpe hkye la na matu du sa ai. Anhte hkrai anhte yubak kaw na hkye hkrang la ai lam nlu mat sai majaw Karai Kasang gaw hkristu hpe sha ngun ya nna yubak lu ai ni hpe hkye la na matu du sa ai lam chyum laika hta shaleng da nga ai. Dai majaw hkye hkrang la ai lam lu na matu shachyip ya ai, galaw ya ai gaw Karai Kasang re. Anhte galaw ai akyang lailen a majaw nre. Anhte kaja ai bungli galaw ai majaw nre. Dai hpan Madu sharawng awng ai lam madung gaw,ngai ndang di nngai law, nchye nngai law, Madu e nang galaw ya ai,nang lajang ya ai hpe chyeju dum sai law ngu nna shagrit shanem ai myit, daw grawp ai myit hte tinang a yubak mara hpe yin la nna ngarai hte sha gringdan ai re hpe yin la chye na nna Karai Kasang a chyeju hpe hkap la kam sham ai ni hpe jaw ya ai akyu gaw dai hkye hkrang la ai lam rai nga ai.

 

Dai hkye hkrang la ai hpe dai ni naw hkrung nga yang, dinghta ga ntsa e nga nga yang chye na na matu Karai Kasang gaw anhte hpe mungga ka da ya sai. I Yaw 5:13 hpe atsawm sha hti yu nna n gun la ga.

 

Udang ntsa na damya langai myi nsa nhti ai yang,Yesu e,nang na a mungdan hta du wa yang, ngai e dum rit law,ngu nna hpyi wu ai.Shaloi Yesu gaw,Ngai nang hpe teng teng tsun de ga, Dai ni jang nang ngai hte rau Hparadisu e nga na rai nga ai,ngu nna shi hpe htan wu ai. [Luka 23:42-43]

 

Dai majaw hkye hkrang la ai htani htana asak lu ai ngu ai gaw Karai Kasang galaw ya ai re majaw dai ni naw hkrung nga yang chye na let kabu na matu, dai kabu ai hpe asak hkrung nga laman mungkan hta sakse hkam na matu Karai Kasang ra sharawng ai re.

 

Dai majaw hkye hkrang la ai lam hte magma bungli ngu ai lam hpe Karai a mungga matsun hku ding ding chye na ai hte asak hkrung ga ngu ga saw n gun jaw dat nngai law.

 

 

Rev. Bum Seng Li

 

 

contact us