Make your own free website on Tripod.com

MATSING HPA

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA
Hpaji Byeng-ya hpe tam la u, zai byeng-ya hpe tam la u...
Ga Shagawp 4:5

Mau Hpa Karai a Lakawn ai Lam.

Egutu mung kaw nna Mawshe woi pru wa ai Israela amyu sha yawng wan 2 jan na re. Dai daram law ai masha ni a ra ahkyak ai lam she sawn sang ga nga yang;

Lani mi malu masha ton 1000 nlaw htum ra na re. Ya prat na deng mi (1 mile) galu ai wan leng lahkawng hpring re ai malu masha ra na re. Masha yawng hpe shani shagu Ham Burger ma lahkawng she jaw sha ga nga yang shaning 40 ning a matu $ wan 3000000 ma na re. (Hkrun lam hkawm ai ni Ham burger ma lahkawng hte sha law na i?)

Hkun hkraw nna kahtet la ai hkrun lam hta masha hte du sat ni lu na ntsin lani mi n law htum gallon 2,000,000 ra na re. She mari jaw ga nga yang America mungdan a manu hku lu hka hta sha pyi shaning mali shi ning hta $ wan 150 ma na re.

Masha shagu rai hkrut, hka shin, rai kashin ai hta lang ra na hka lani mi gallon 4,000,000 ra na re. Ndai hta mung $ wan 300 bai ma na re. Lani mi shat shadu sha na ju hpun ton 4000 jan ra na re. Gas (snr) dat wan (electric) hte she shadu sha ga nga yang shaning 40 ning matu $ wan 12000 hkrat ang na re.

Masha langai laning mi hta hkyep din (Labye) man mi galai din ra ai rai yang shaning 40 ning hta hkyep din a manu hkrai $ wan 1000 ma hkrat na re.

Masha langai laning mi hta bu labu palawng man mi mari galai ga nga yang shaning 40 ning a matu $ wan 2000 hkrat ang na re.

Woi awn ai ning baw Mawshe hku nna ndai ni yawng sawn sang nna she hkrun lam hpang na myit ai nga yang gara hku tsun wa na? Karai Kasang e Bill Gate zawn re ai masha marai 5 daram sha n madi shadaw yang gaw nbyin na nhten!. Dai rai tim pyi, hkrun lam hta 'Fast food' seng Macdonald, Burger King zawn re ai nnga ai re lu !!! Dum nga nni? Mahkoi nga na nhten!!! Rai tim Karai shanhte hpe shakyet tawn a ni? Mau hpa shaman chyeju hte shanhte hpe bau maka lakawn sai nrai i?

Yesu Hkrung Rawt ai Lam hte Seng nna Jahpyak ai Lam ni

       N kam ai masha ni Yesu a hkrung rawt ai lam hte seng nna amyu myu tsun jahpyak ma ai. Yesu hpe wudang hta jen ai rai tim n si ai sha lup kau hkrup ma ai. 'Kya kahpap malap (Swoon) mat hpe si ai shadu kau nna lup kau hkrup ai she re. Masum ya ngu na hta lup sung hku kaw nna bai amya pru wa ai she re' da.

       Nkau mi bai rai jang, Yesu si mat ai hpang shi hpe ladu lai myit dun ai sape ni hte shi a hpang hkan ai ni Yesu hpe shingran (Hallucination) hku nna mu ma ai hpe 'Shi hkrung rawt sai' nga nna kajai shi shamawng ai she re nga ai. Nkau mi bai rai jang, Mari hku nna Yesu a lup de sa kawan ai shaloi, sun sin wa hpe Yesu shadu nna atsawm bai njep yu ai sha, Yesu hkrung rawt sai nga nna ma katu dumbre mat wa ai she re nga ai. Bai nkau mi bai rai jang, hkrit kahpra nga ai Mari hte kaga sape ni gaw Yesu a moi mang kawan na nga sa wa ai shaloi nau hkrit ai majaw, Yesu a lup sung hku madung nre ai moi mang nrawng ai kaga lup hpe sa yu hkrup nna, 'Shi hkrung rawt sai' nga nna kajai hpang dat ma ai she re nga ai. Nkau mi bai tsun ai gaw, sape ni Yesu a moi mang lagu shaw la nhtawm, Yesu hkrung rawt sai nga nna shiga masu shapoi shabra ai she re bai nga ma ai. Ndai zawn jahpyak ai lam ni jaw na kun? sawn yu ga;

       Amyu myu zingri katut, garep e nri hte galun waw katut, sai htaw nna malap mat wa ai masha langai mi hpe, mang mawn hkayawp ai pawng 75 daram re ai sumpan hte ahkang hkayawp tawn ai ngu ga. Dai masha wa shi hkrai lup kata kaw na amya pru wa lu na kun? Lup sung hku hpe pat tawn ai nlaw htum ton 1.5 daram li nak ai nlung pa hpe lu galau na kun? Nmai byin na re. Myit dun la nna marit dik ai majaw shingran mu ai hpe sha hkrung rawt ai ngu nna tsun ai rai yang, Pawlu zawn shawng daw de Yesu hkrung rawt ai ngu ai hpe kachyi mung nkam ai sha n ga pyi nkam madat ai masha ni, hpang daw de Yesu hkrung rawt ai lam si n tsang sakse hkam wa ai gaw hpa majaw rai ta? Lup sung hku shut ai nga yang, Yesu hkrung rawt sai ngu ai shiga hpe kachyi mung nkam madat ai Yuda masha ni hku nna Yesu a lup madung hpe madi madun chyalu re. Ndai lam lama she teng ai rai yang, Roma asuya ni hte Yuda ningbaw ningla ni hpa majaw sape ni hpe bai nje yang ma ai rai ta? Lagu ai she teng yang gaw nje yang gaw nnga na re. Sape ni moi mang lagu na hkum tsun, Yesu si ai hte shagri brep nna, galang htim ai shaloi na uhkai hkalung ni zawn zumbru zumbra hprawng lam she n katut rai mat wa sai aten she re. Yesu si mat ai aten hta shi a sape ni gaw, myit mada lam htum mat sai ngu nna bra ayai mat sai re, tinang chye ai hku abram hkawm mat wa sai. Masum ning jan Yesu a hpang hkan ai hpe sum kaba hku nna she hkam la mat sai ni rai nga ma ai.

      Rai tim, Yesu si ai kaw na bai hkrung rawt wa ai hpe myi chyaw ta tut mu chye wa ai shani kaw nna gaw, Yesu a lam nhkrit ntsang ndut ndang sakse hkam wa ma sai. Mau hpa hkrung rawt ai atsam hte myit mada lam nnan hta asak hkrung ma sai. Hkrung rawt ai lam a atsam gaw kade mau hpa wa rai nga a ta? Lahta na jahpyak ai lam ni she teng yang, shanhte ndai zawn asak hkrung na ma ai kun?

     Yesu hkrung rawt ai masat nhtoi hta kalang bai sumru ging ai mungga gaw; NGAI GAW BAI HKRUNG RAWT AI LAM HTE ASAK HKRUNG AI LAM RAI NGA NNGAI; NGAI HPE KAM SHAM AI WA GAW SI MAT TI MUNG AHKRUNG NGA NA RA AI... nga ai re. Kasa ni sape ni hpe atsam nnan hte woi awn ai hkrung rawt ai Madu gaw dai ni mung Shi hpe kam sham ai ni hpe lam woi nga ding ngam re.

Ga san:  : Si tim hkrung ai ngu ai gaw hpa lachyum rai ta?