Make your own free website on Tripod.com

JANUARY SHATA 1-15

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

JANUARY (1) YA SHANI: SHI HPA AP U
" Shawng ningpawt e Karai Kasang gaw sumsing lamu hte ginding aga hpe hpan da wu ai" (N.N 1:1).

Mungkan ntsa nga manga pra mapra hte lamu ntsa nga manga gaw Karai e hpan da ai hkrai, Shi a majaw she nga nga, grin nga ai re. Mungkan ga nnan lat kaw nna dai ni du grin nga lu ai mung Karai a majaw she re. Mungkan masha kade hpaji chye, kade atsam rawng ai nga tim Karai a man e hpa n rai, Karai a atsam hte gaw shadawn pyi n mai ai. Dai zawn re ai atsam Madu hpe chye chyang lu na ahkaw ahkang gaw kade kaba ai ahkaw ahkang ai nga a ta? Dai Karai hpe na a 2008 ning hkrun lam ma hkra hpe ap nawng na mai kaja nga ai. Atsam rawng ai hpan Madu gaw na a asak hkrun lam hpe apyaw sha lit la ya lu ai kam u. Na a ru yak ai lam hte myit chyat ai lam ma hkra Shi a lagaw nhpang e kabai tawn u.

JANUARY SHATA (2) YA: NANG MANU DAN AI
...Karai Kasang gaw shi a hkrang sumla hte maren shinggyim masha hpe hpan da wu ai... (N.N 1:27).

Karai gaw nang hpe grai manu dan ai hku hpan da sai. Du sat hte n bung ai, hpun kawa hte n bung ai, Shi a hkrang sumla hte raw hpan da sai. Karai hta anhte zawn myi, na, lagaw lata tu ai, nga ai ngu tsun mayu ai n rai. Anhte hta Karai hte matut mahkai lu na atsam rawng ai wenyi nga ai. Dai hta sha n ga, Karai zawn myit sawn chye ai, sumru chye ai atsam nga ga ai. Myit dawdan lu na atsam, hkam sha chye ai atsam ni gaw Karai hte nsam bung ai lam ni re. Dai majaw Karai gaw, hpan da hkrum ai ni yawng hta nang ngai hpe grau nna manu shadan ai re. Karai a man e nang manu dan nga ai majaw dai ning January shata kaw nna matut hkawm sa mat wa na hkrun lam hta tinang hkum hpe manu chye shadan na ahkyak ai. Tinang hkum manu n chye shadan ai majaw byin pru chye ai awu asin agang chyalang re ai lam ni hpe koi gam u.

JANUARY SHATA (3) YA SHANI: NANG HPE KARAI JAW AI LIT
... ga ting hpe jahpring nna dai hpe up nga lu mu... (N.N 1:28).

Karai manu shadan ai shinggyim masha hpe Karai gaw lit magam mung ap tawn sai. Mungkan ga ting hpe yu lajang rem kyem na lit kaba shinggyim masha ni lu ma ai. Ningnan hpan da ai shani kaw nna ya dai ni du hkra mungkan masha law la ai rai tim, langai hkrai a ntsa Karai jaw ai lit magam hte Karai a myit mada ai lam gaw bung ai n rai. Mungkan ntsa masha shajan hku nna sa pra na matu Karai e ahkaw ahkang jaw hkrum ai kadai n nga ai. Dai hpe n dum ai majaw lit kata masha zawn nga ai ni chyawm law nga ai. Dai hta nang ngai mahkoi lawm nga ai kun? Na a matu Karai jaw ap tawn ai lit gaw hpa rai kun? Karai hpe n chye ai masha n kau mi pyi shanhte a lit magam ni hta grai kangka chye nga ma ai. Hpan Karai hpe chye la lu na ahkaw ahkang kaba lu ai nang ngai gaw shahte hta grau nna tinang a lit magam hte kangka sadi sahka asak hkrung n ahkyak na i?

JANUARY SHATA (4) YA SHANI:KARAI MYIT DIK LU NA KUN?
...Shaloi Karai Kasang gaw shi hpan hpajang da ai amu yawng mayawng hpe yu yu nna , yu mu, dai gaw nachying kaja nga ai... (N.N 1:31).

Kadai mung tinang yaw shada lam kaba hte galaw ai magam bungli byin pru wa yang grai myit pyaw myit dik chye ai. Dai hten run wa yang chyawm gaw yawn chye pawt chye ga ai. Karai a yaw masing kaba hta nga manga hpe hpan ai bungli kaba galaw ngut ai hpang, Karai gaw shi hpan hpajang tawn ai lam ni hpe yu nhtawm grai myit dik myit pyaw wu ai. Hpa majaw rai ta? Shi yaw shada myit mada ai hte maren byin pru wa ai majaw rai nga ai. Hpu nau wa e, na a ntsa e mung Karai gaw yaw shada lam kaba hte hpan ai re. Tinang hkum hpe manu shadan let, tinang a dinghku nta masha ni a ntsa, htingbu htingbyen ni a ntsa, magam bungli ginra na manang ni a ntsa mai kaja ai magam bungli galaw let Karai myit hpe shadik ya na Shi myit mada nga ai dum u. Nang hpe yu nna Karai myit dik myit pyaw lu na kun?

JANUARY SHATA (5) YA SHANI: SATAN A LADAT
...Karai Kasang kaja wa tsun a ni? (N.N 3:1-3)

Satan gaw Karai a bungli hpe jahten na aten tup shakut nga ai wa re. Hpan da ngut ai hpang Karai a myit dik ai lam hpe jahten na maw sai. Karai e manu shadan dik shinggyim masha Adam yan Ewa hpe gunglau nna Karai hte daw hka hkra lajang sai. Shi a gunglau ai ladat gaw mana maka si mani ai. Shan hpe kalang lata n sa shagyeng ai. Karai a ga hpe tawt lai hkra, ung ang ai myit masin bang ya na matu lahta na gasan san nna hkalem sai. Ewa hte Adam dai hta hkrat sum mat nna kade daram sum machyi mat wa ai gaw yawng chye nga ga ai. Dai ni mung shinggyim masha shagu hpe Karai hte daw hka hkra dai ladat hpe matut lang nga ai. ..Kalang hte sha gaw hpa n byin wa na re!!!..., ...Chyam sha pyi chyam yu u!!..., Nang hpe kadai chye na n re..., nga ai si mani ga ni hte hkalem chye nga ai sadi ga. Shawng nna e Satan gaw lapu hpe jai lang ai zawn, ya dai ni Satan jai lang ai arung arai, masha, masa, sharin shaga lam ni hte kaga ladat amyu myu naw nga ai. Dai ni hta na yawng, yawng mat ai rai yang prat tup sum machyi wa ai baw byin pru chye nga ai. Sadi maja let asak hkrung ga.

January 6: KARAI A MUNGGA HTE NGAI
...dai hpe mung hkum hkra myit... (N.N 3:1-4)

Adam yan Ewa hpe tsun da ai ga hta, sun ka-ang na namsi hpun a asi hpe hkum sha she nga ai, hkum hkra nga ai n lawm ai. Tim, Ewa hpe lapu san ai shaloi Ewa gaw ...sha mung hkum sha, hkra mung hkum hkra... nga Karai tsun ai ngu nna jat tsun sai. Dai hta Satan gaw Ewa a myit masin hpe chye mat sai. Ndai jan Karai a ga hpe jat tsun sai, matut nna gunglau mai sai ngu ai hpe chye sai. Dai majaw matut gunglau ai hta Ewa hte hpawn Adam mung hkrat sum sai. Tsaw ra ai hpu nau wa, anhte gaw Karai a mungga matusn hta n jat n shayawm ai sha asak hkrung, hkan nang hkan sa na matu she re. Tinang myit sawn lu ai hku tak la nna tsun shaga hkam la ai lam ni yawng gaw hkrat sum nhpang ni sha re. Dai majaw mung Karai a mungga hpe Shi tsun mayu ai lachyum hku nna hkam la chye na matu Karai a mungga hpe hkaja hti achyin let dai hpe hkan nang na ahkyak nga ai. Ndai shaning gaw shawoi na hta mungga grau hti ai shaning, grau hkaja ai shaning rai lu na ap nawng ga. Shaloi Karai a mau hpa shaman chyeju teng sha mu mada hkam la lu na re.

January 7: KARAI NANG HPE MANAWN NA KUN?
...Karai Kasang hte maren nan tai na marin dai gaw, Karai Kasang chye nga ai... ( N.N 3:1-5).

Ewa hpe gunglau ai Satan gaw, kalang mi lu masu hpang ai hte matut manoi masu sai. Nan hpe sun ka-ang na hpun a asi hpe n sha shangun ai gaw Karai nan hpe manawn ai majaw she re, lama sha yang Shi zawn byin wa na n ra ai majaw dip da ai she re nga tsun sai. Dai ni mung Satan gaw dai zawn sha matut gunglau nga ai.... Chyum laika she hkan yang gaw galoi galu kaba na n re..., nga hkam la ai ni mung law la nga ai.... Makam masham hkrai nga yang hpa bungli n byin ai..., nga ai ga ni mung anhte a makau grup yin e law nga ai. Dai lam ni ma hkra gaw Satan tsun ai ga hte hpa n shai, langai sha re. Karai nang ngai hpe manawn na kun? myit yu ga. Dai zawn n sawn, n myit la na, dai zawn re ai myit jasat hte asak n hkrung na grai ahkyak nga ai. Karai lawm yang n byin ai..., ngu ai hpe kabai kau da nhtawm, Karai n lawm yang hpa mung n mai byin ai..., ngu ai hpe kam let, hkam la let asak hkrung ga.

JANUARY 8: N KAM YIN LA HKRAW AI ANHTE

...Ngai hte rau nga na, nang ngai hpe ya ai num gaw dai hpun hta na ngai hpe di jaw nna ngai sha kau se ai... (N.N 3:12)
Ewa the Adam gaw Karai e hkum ban tawn ai namsi hpe sha manu ai. Tinang tawt ai mara hpe n lu yin la, n kam yin la ai Adam gaw Ewa hte hpawn Karai hpe mahtang mara shagun sai. Ngai shut ai gaw na majaw re, nang ngai hpe jaw ai Ewa a majaw re, nga nna mara jahpa la na shakut wu ai. Rai tim, Karai dai hpe hkap la a ni? N hkap la ai. Adam yan Ewa a prat kaw nna hkrat sum mat wa ai anhte shinggyim masha ni mung Adam hte maren sha re. Tinang shut wa yang yin hkam la na gaw hkra, masha ni a ntsa kabai mara na shakut chye ga ai. Dai hpe Karai n hkap lu ai. Karai n mu n chye lu hkra makoi da lu na daram kaji ai mara n nga ai zawn Karai e mara n lu raw na daram kaba ai yubak mara mung n nga ai. Dai hpe dum let shut hpyit tawt lai ai yubak mara hpe hpyi nyem tawng ban nna kabu gara ai chyeju hta asak hkrung hkawm sa ga law. Dai zawn shagrit shanyem let hpyi nyem tawng ban ai ni hpe Karai gaw mara raw ya nhtawm mau hpa shagrau shatsaw na re mungga ga sadi nga ai dum ga.
JANUARY 9: MARA HTA MARA JAT
...Ka-in gaw shi kanau Abela hpang de rawt nna, shi hpe sat kau wu ai...(N. N 4: 8)
Adam a shadang sha yan rai nga ai Ka-in hte Abela gaw Karai hpe tinang galaw ai magam kaw na shagu hkungga nawng ai shaloi, Abela a hkungga hpe Karai hkap la ya ai re. Hkristu a asai jahkaw nna shingyim masha hpe hkye la na kumla hpe tau hkrau madun ai hku nna Abela a shagu hkungga hpe hkap la ya sai. Ka-in hpe mung kahtap nna ahkaw ahkang jaw ai rai tim, dai hpe Ka-in n hkap la ai. Pawt bu nna kanau hpe manawn masham myit rawng sai. Dai manawn masham ai myit gaw jahtum e kanu hpe sat kau ai kaw du hkra kaba wa sai. Kade hkrit hpa rai ta? Ka-in gaw tinang hkum hpe Karai a man e byeng sharai na ahkaw ahkang lu tim, dai hpe n gawn n sawn galaw nhtawm kanau hpe pyi sat sai. Anhte hta mung manawn masham ngu ai byin pru chye nga ai. Dum nta masha shada, htingbu htingbyen, magam bungli galaw manaw manang ni hpe manawn masham myit rawng wa yang Ka-in zawn n shanang ai sha lawan ai hku byeng sharai let Karai a shaman chyeju hpe ala nga ga.
JANUARY 10: KRAW LAWANG HPE YU AI WA
...Shi a kraw lawang na myit maw mamaw gaw tut tut n shawp nga ai hpe ...mu wu ai majaw...shi a kraw lawang e yawn nga ai... (N.N 6:1-5).

No-a a aprat hta shinggyim masha ni Karai a man e awu asin matsat shabat rai nga ai hpe Karai mu chye wu ai. Shanhte shamu shamu shamawt tawt lai ai mara ma hkra chye hpe ya ai hta sha n ga, myit masin kata hta rawng ai yawng hpe mung mu ya ai majaw Karai a myit hta grai nan yawn nga ai. Anhte kalang lang tinang a hkum hkrang hte shamu shamawt nna galaw tawt lai ai mara hpe sha mara hku nna masat sawn la chye ga ai. Karai gaw myit masin hpe mung mu nga ai wa re malap chye ga ai. Myit kraw kata hta shawng shangai hpang nna shinggan de dan dawng shamu shamawt wa ai re hpe dum nna Karai hpe tinang a myit masin jep joi jasan jaseng ya na matu tut akyu hpyi ra nga ga ai. Shakawn Kungdawn ka ai wa zawn, ...Karai Wa e ngai hpe manaw yu nna, nye a myit mang ai lam hpe chye ya e… ngu akyu hpyi let asak hkrung ga.

JANUARY 11: LANGAI SHA RAI TIM
...Noa gaw Karai Kasang hte rau a hkawm a sa nga ai...N.N 6:9

Masha gaw kaga masha malawng a hkawm sa asak hkrung ai lam hpe yu nna len la asak hkrung chye nga ai. Masha malawng a myit jasat e aloi sha ka-up kau ai hpe ndum shami mung hkrum chye nga ai. Masha ni rai ai hku n rai yang kaya chye ai, madang n dep dum ai anhte rai nga ga ai. Kaja ai lam hta len la yang gaw hpa n ra ai. N hkru n kaja ai lailen ni kap na, Karai hte nhtan shai ai myit jasat ni kap na sadi maja ra ai. Noa gaw ndai lam hta kasi la mai ai wa re. Mungkan ting Karai hte nhtan shai ai hku hkawm sa ai hpe makam hte ninghkap nna Karai hte rau hkawm sa ai wa re. Mungkan ting Noa hpe mana shadu ai, masha shajan shadu ma ai. Tim, Karai shi hpe shakawn shagrau sai. Hpu nau wa e, masha yawng e hkan ai lam rai tim, wenyi ningmu hku nna jep joi yu, shen yu nna she hkan mai n hkan mai myit yu ra na re. Masha a man e htap htuk na hta Karai a man e htap htuk na gaw grau ahkyak nga ai n rai i?

JANUARY 12: TSUN AI HTE MAREN GALAW AI KARAI

Add your content here

Dai sha-u ing ai gaw ga ningtsa e mali shi ya tup ing wa ai rai nna...(N.N 7:17)

Noa Karai hpe kam ai makam gaw mau hpa re. Karai shi hpe matsun ai hte maren hkrak, sanghpaw li shachyaw sai. Shi a shawng daw hta mungkan ting sha-u ing ai ngu ai byin mung n byin ga ai. Tim, Karai tsun ai majaw shi dai hpe kam wu ai. Karai mung kaja wa sha, shi tsun ai hte maren galaw sai. Shawng de byin ga, n byin ga, mai byin n mai byin ngu ai gaw shinggyim masha ni a myit sawn shachyaw chye ai lam she re. Shinggyim masha a tsam hta n mai byin ai law law hpe Karai shabyin ai n rai a ni? Karai gaw tsun ai hte maren shadik shatup ai wa re ai hpe kam yang, nang ngai shi a kashu kasha anhte yawng hpe shi lit la na re nga ai ga sadi ni hpe mung kam nna asak hkrung nga ga.

JANUARY 13: MAKAM MASHAM A LAGAW LAHKAM

...dai rai nna Abraham gaw, Yehowa shaga wu ai hte maren pru sa wa ai rai nna... (N.N 12:4)
Makam masham hte lagaw lahkam gaw tsun yang she loi tim, kaja wa hkawm sa wa na loi la ai n rai. Mungkan ting hpe hkye la na lam lajang ai hku nna Karai gaw Abraham hpe lata sai. Shi hpe lamu ga jaw na, amyu kaba mung shatai na nga nna ga sadi hte shaga dat sai. Abraham a daidaw ai buga gaw, nai mam ja kat ga-sau kaja ai, lam shagu hta bawng ring sai ginra re. Dai hpe kau da na loi na n re. Shi a dum nta, tsaw ra ai jinghku ni, galaw lu galaw sha dingngam re ai yi sun hkau na yi-ngam ma hkra hpe rap di nhtawm pru sa mat wa na gaw myit yu nna pyi chyip nga na re. Ura mare chyinghka kaw nna hpang ai Abraham a lahkam gaw, shinggyim masha hku yu yang ram ram angawk ai ngu mai nga ai. Hpang de n kayin mada ai sha pru sa mat wa ai Abraham gaw hpa majaw dai daram gwi a ta? Shi a atsam hpe kam hpa na n rai, yawng hpe lit la ya lu ai, shi hpe ga sadi hte shaga ai Karai hpe tsep kawp kam ai majaw she re. Hpu nau wa e anhte a asak hkrung lam hta e mung, Karai hpe kam nna hkawm sa lagaw lahkam ni hta Abraham zawn makam hte hkawm sa ra ai lam law law nga ai dum ga, Abraham a kasi la gaw.
JANUARY 14: N KAM AI NI A MAN E KAYA KAHPA
...Shi nye a kajan re nga nna nang hpa rai tsun a ta?...
(N.N 12:10-20)

Lahta na ga gaw Abram hpe Hpara-u hkaw hkam tsun ai ga re. Abram a madu jan Sarai grai tsawm ai majaw, shi a madu jan re ngu lama tsun yang, shi hpe masha ni sat kau nna madu jan hpe la kau ya na tsang ai majaw, kanua re nga nna masu sai. Dai hpe kam nna Hpara-u hkaw hkam gaw Sarai hpe madu jan shatai na shaga la sai. Tim, Karai n hkraw ai majaw n byin sai. Abram masu ai hpe Hpara-u chye wa ai shaloi grai pawt wu ai. Karai hpe n chye ai Hpara-u hte shi a mung masha ni a man e Abram sakse kaja n tai lu sai. Kade kaya kahpa rai ta? Hpa majaw masu ai rai ta? Hkrak tsun ga nga yang Karai Kasang shan hpe makawp maga na re ngu ai hpe kam na malai, shi a nyan bawnu hte asak hkrung mayu ai majaw rai nga ai. Zai ladat shagu gaw n kaja ai gaw n re. Tim, tinang a asak matut na, kan bau na matu Karai hpe hpa na malai, Karai hte nhtan shai ai zai ladat shaw ai, jai lang ai gaw shut nga ai. Anhte mung tinang hpe yu nga ai, Karai hpe n chye ai ni a man e gara hku asak hkrung nga ga ai kun?
JANUARY 15: N DUM SHAMI TSAN MAT WA AI WA
...Sodom mare du hkra shi a sum gap wu ai...(N.N 13:12)

Abram hte Lawt gaw Ura ginra kaw na rau pru wa ai yan re. Dusat yam nga law htam wa ai majaw shan hka garan ra sai. Lawt hte hka ai rai tim, Abram gaw Karai hte n hka wu ai. Tim, Lawt gaw shi a jinghku Abram hte hka ai hta sha n ga, Karai hte ani sha hkawm sa ai lam mung n nga sai. Abram gaw shi a kasha daw ai Lawt a matu Karai kaw pyi hpyi htinglu ya ai wa rai nga ai. Rai tim Lawt gaw shi a matu pyi akyu hpyi na, Karai hte htinglu na n dum mat wa sai. Hpa majaw rai ta? Mungkan a nga pyaw lam hpe chyu baw bang nna asak hkrung mat wa ai majaw re. Karai a man e mala la n hkru ai Sodom mare de pyi n dum shami shang mat wa nu ai. Anhte mung dai zawn byin chye ga ai. Kaning re ai ten hta byin chye ga ta? Shaman chyeju yawng a npawt daju Karai hte ni ni hkrung nna shi a chyeju la na malai, Karai hpe shingdu dat ai lai ladat hte nga mu lam tam ai rai yang dai zawn byin na re adum nga ga.