Make your own free website on Tripod.com

JANUARY 16-31

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

JANUARY 16: KARAI HTE N HTAN SHAI AI HPAJI LADAT
...dai re ai majaw nye a shingnan jan kaw shang u...(N.N 16:1-3)

Dai ni mungkan ting a matu manghkang kaba langai rai nga ai Israel hte Arab a manghkang gara kaw na hpang a ta? Chyum laika labau hkrak gawn yang, Sarai a bawnu kata kaw na hpang ai ngu tim shut na n re. Karai nan Abram hpe shadang sha jaw na tsun da nga ninglen, Karai a atsam hte Shi a aten hpe n chye na ai Sarai hpa galaw a ta? Dai aten na Karai hpe n chye ai ni a lai ladat lang n htawm, shi a mayam num hpe Abram la na tsun hpaji jaw sai. Shaloi, Abram gaw dai mayam num hta Ishmaela hpe lu sai. Tim, Karai dai hpe n hkap la ai. Aten du jang Sarai nan Isak hpe shaprat sai. Isak kaw na prat pra wa ai Israela amyu sha ni hte Ishmaela kaw na pra wa ai amyu lakung ni dai ni du ban prat hte prat kasat gala ra nga ma ai. Sarai a Karai hte nhtan shai ai hpaji ladat a majaw rai nga ai. Dai majaw ya dai ni mung anhte kam sham ai ni a myit sawn sumru hpaji ladat shaw ai lam ni hta Karai a atsam, Shi a aten Shi a ladat ni hpe chye na nhtawm dai ni hte nhtan shai ai lam hpe koi gam na grai ahkyak nga ai.



JANUARY 17: YAK WA YANG SHE KARAI SHAGA
...ngai hte na a lapran Yehowa jeyang ya mi ga...
(N.N 16:1-5)

Abram hpe amyu kaba shatai na ga sadi nga ai hpe Sarai chye nga ai. Tim, Karai a aten hte ladat hpe shingdu dat nna Abram hpe Karai hte nhtan shai ai ladat hpaji jaw sai. Makam hta Karai hpe manoi nna Shi a aten la na malap kau sai. Shi hpaji jaw ai hpe Abram mung hkap la nhtawm Sarai a mayam num Hagara hpe Abram la sai. Hpa byin wa a ta? Hagara na-um nasin rai wa ai shaloi, Sarai hpe n gawn n sawn di sai. Sarai nga yak sai. Shaloi she shi hpa tsun wa a ta? Abram hpe mara shagun wa sai. Na a majaw ngai jam jau re nga wa sai, ... Yehowa jeyang u ga.. nga wa sai. Shaloi she Karai hpe gang shalawm wa sai. Hpu nau ni e anhte mung Sarau zawn rai chye ga ai. Tinang jaw dum ai galaw nga yang, Karai a ladat, atsam, yaw masing hte nhtan shai n shai ngu ai gaw rap, shanang tik tik rai chye ai. Tinang she hpang nna yak wa yang gaw, nye mara n re, na mara she re nga chye ai. Shaloi she Karai e nga nna Karai hpe dum wa, Shi a mying shaga wa chye nga ga ai. Dai zawn re ai lam hpe ja ja koi gam na ahkyak nga ai. N dum shami lama shut wa tim pyi, masha hpe mara shagun na malai, Karai e ngai shut ni ai...nga nna yin hkam byeng sharai ra na na ga ai.

JANUARY 18: MU CHYE NGA AI KARAI
...Nang gaw mu lu ai Karai Kasang rai nga ndai...
(N.N 16:6-16)

Anhte nawku kam sham ai Karai a tsawra myit gaw mau hpa rai nga ai. Abram hpe amyu kaba shatai na ga sadi hpe Sarai hku nna shadik shatup na yaw masing kaba nga ai. Tim, dai hpe myit sawn kam shut ai Sarai hte Abram a majaw, lapran e Hagara jam jau sai. Hagara a kasha hpe Karai gaw Abram a matu shaman chyeju mahkrun n shatai ya ai gaw teng ai. Tim, Karai gaw Hagara hte shi a shangai wa na shandang sha hpe yu nan n yu, matsan nan n dum ai Karai n re. Sarai dingsa ai majaw nta na hprawng pru mat wa ai Hagara a tsin-yam hpe mu chye ai Karai, Hagara hpe matsan dum ai Karai re. Dai majaw Shi a lamu kasa nan dat nna shi hpe n-gun jaw sai. Dai chyeju hpe hkam la lu ai Hagara gaw Karai hpe kabu gara chyeju shakawn wu ai. Nang gaw mu lu ai Karai nan rai nga ai nga nna Karai hpe shakawn wu ai. Anhte dum chye n-gun la ra ai lam law law nga ai. Kalang lang anhte hkrum sha hkam sha ai mayak manghkang hpe Karai n mu n chye sam ai nga nna hkam sha tsun shaga chye ai anhte rai nga ga ai. Dai htani htana hpung shingkang hte hpring tsup ai Karai gaw na a tsin-yam hpe mu mada chye na ya ai hta sha n ga, na matu kaja dik ai lam lajang ya ai Karai r adum nga u.
JANUARY 19: SHI N SHABYIN LU AI HPA NGA NA
...Yehowa n di lu ai amu lama mi nga a ni?
Karai a lamu kasa ni Abraham kaw sa nhtawm, Karai a ga sadi nga ai hte mamren nten du jang Sara gaw shadang shangai na re nga sa tsun sai. Asak grai kaba la sai Abraham hte Sara gaw, shinggyim ningmu hku tsun ga nga yang, ma lu na n mai byin sai. Dai kasa ni tsun ai ga hpe Sara n hkrup nna mani ai majaw, Abraham hpe lahta na gasan san ai re. Shinggyim a htung tara, shingra tara a htung tara maka hta n mai byin ai lam ni law nga ai. Shawoi n byin ga ai hpe byin wa na, tai wa na kadai n shadu ai. Tim, yawng hpe hpan tawn hpan da ai Madu gaw shing-ra tara a ntsa e nga ai. Dai shingra htung tara ngu ai gaw Shi lajang tawn ai sha re. Dai majaw shingra tara gaw Karai ra sharawng ai lam ni byin tai wa lu na lam hpe kachyi mi mung n lu shingdang ai re. Anhte a asak hkrung lam hta e mung, Karai shabyin shatai na mungga ga sadi law la nga ai. Dai lam ni hpe tup hkrak dik tup wa na re kam ra ai. Sadi ra ai lam langai mi gaw, tinang ra sharawng ai hpe Karai sharawng n sharawng n chye ai sha, Karai a atsam hte shabyin shatai mayu ai gaw shut nga ai.
JANUARAY 20: JINGHKU WA A MATU AJA AWA AKYU HPYI AI WA
...dai mare hta marai shi tup mu hkrup na wu ai nhten... (N.N 9:22-33)
Abraham gaw shi a kasha daw ai Lawt hte hka mat wa ai rai tim, Karai hte galoi n daw n hka asak hkrung wu ai. Dai majaw Karai gaw Shi a magam masing kaba ni hpe Abraham hpe tsun dan chye nga ai. Sodom ngu ai Lawt e lata la ai shara gaw Karai a man e n shawp mare rai nga ai majaw dai hpe Kara jahten kau na lam Abraham hpe tsun sai. Abraham gaw, Lawt nga ai mare rai nga ai majaw, dai mare hpe n jahten na lam akroi anoi hpyi shawn sai. Dinghpring ai masha 50 lama nga yang hkum jahten nga nna nden marai hte Karai hpe tsun ai. Tim, manga shi n nga ai lam Karai tsun sai. Kahtap nna lang hte lang hpyi shawn ai hta lama marai 10 nga yang dai ni hpe matsan dum ai myit hte Sodom hpe n jahten na hpyi ai. Tim, marai 10 n nga ai lam Karai tsun sai. Sodom hpe Karai jahten kau sai. Tim, dai mare hpe jahten ai shaloi, Abraham a akyu hpyi nsen hpe Karai dum ya wu ai, Lawt hpe Sodom kaw na hkye la sai (N.N 19:29). Anhte kam sham ai ni mung tinang a jinghku na matu Karai kaw hpyi shawn chye na grai ahkyak nga ai. Kaja wa myit masin hta tinang hte seng ai ni a matu hpyi shawn ai rai yang, Karai gaw anhte a akyu hpyi nsen hpe matsan dum nna madat ya na re.
JANUARY 21: GA SADI SHADIK AI KARAI
...Yehowa tawn da ai ga ndat hte maren Sara hta shadik wu ai...(N.N21:1-3)
Karai gaw ga sadi majoi jaw ai Karai n re. Jaw ai ga sadi hpe mung galoi mung shadik shatup ai Karai rai nga ai. Dai zawn shadik shatup ai hta Shi a aten hte shi re. Abraham hpe amyu kaba shatai na matu ga sadi hte Ura ginra kaw na shaga shaw wa ai Karai Shi tsun ai hte maren galaw ai Karai re. Sara asak grai kaba sai re. Tim, Karai shabyin ai a marang e Abraham hte Sara gaw shadang sha hpe hkam la lu ma ai. Kasha mai lu ai asak aprat lai mat ai hpang, shing-ra tara hku sawn yang n mai byin mat sai shaloi she Karai gaw shi a ga sadi hpe shadik shatup wu ai. Hpa majaw rai ta? Karai hta shi a masing jahkrat tawn ai aten ahkying nga ai majaw re. Dai sha n ga, ndai lam gaw Karai shabyin ai nan re ngu ai hpe adan aleng sha mu mada lu na matu mung rai nga ai. Dai ni anhte Shi a hpe kam nna shi a kasha byin tai sai ni a matu Karai jaw tawn ai ga sadi law law nga ai re. Dai ga sadi ni gaw dik nan dik wa na hkrai re. Karai a aten garai n du ai majaw n mu mada lu ai she re, nan nan n byin wa na n nga ai. N mai byin ai lam mung nnga ai hpe dum let Shi hpe matut kam sham ga
JANUARY 22: KARAI A ATEN CHYE LA GA
...Karai Kasang ndat da ai ahkying hta... (N.N 21:1-5)

Karai Kasang bungli galaw ai hta, galoi mung n hpang hkrat ai. Jau mung n jau ai. Shi a aten hte shi hkrak hkrak rai nna bungli galaw ai Karai re. Anhte shinggyim masha ni she, magam bungli galaw yang nau tin mat nna, shing n rai, nau hpang hkrat mat nna n byin mat ai ngu ai nga chye ai. Htani htana grin nga ai Karai gaw chyalai nyan atsam hte hpring tsup ai wa re. Shi galaw ai magam bungli hta, aten sekkan mi jau mat ai, sekkan mi hpang hkrat mat nna n byin mat ai ngu ai n nga ai dum ga. Sara hpe kasha jaw na lam ga sadi nga ai re. Dai hpe Abraham hte Sara gaw Karai a aten n la kau ai majaw manghkang kalang pru sai re. Ya Karai gaw Shi a ga sadi nga ai hte maren Isak shadang sha hpe Sara hku nna nan jaw sai. Nang ngai mung dai hpe dum ga. Anhte kalang lang Karai hpe la na malai tinang ahkyak dum nna tin shapun rai Karai hte nhtan shai ai shinggyim ladat hte tinang ra sharawng ai hpe shanang galaw chye ga ai. Dai gaw shaman chyeju lu na malai, manghkang grau shalaw la chye ga ai dum hprang ga.

JANUARY 23: MAKAWP MAGA AI KARAI
...Karai Kasang mung dai ma hte rau nga nga ai rai nna...
(N.N 21:20)
Abraham hpe jaw ai ga sadi gaw Isak hku nna sha dik tup wa ai gaw teng ai. Tim, Karai gaw Ishmaela hpe mala la di kau a ni? Dai zawn di wu ai n rai. Kanu Hagara a tsin-yam hpe mu ya ai Karai gaw kasha Ishmaela hpe mung matsan dum nna shaman ya sai. Shi hpe amyu kaba shatai na lam tsun sai. Nang ngai anhte a asak hkrung lam hta e mung Karai gaw matsan dum nna anhte hpe lakawn nga ai hpe dum ga. Karai ra sharawng ai lam hpe anhte n dum shami shing n rai adum dum lale ai rai tim shi gaw anhte hpe naw matsan dum nga ai hpe dum let, Shi a tsaw ra myit hpe chye na nhtawm Shi a ra sharawng ai lam hta matut asak hkrung na ahkyak ai. Karai a tsawra myit hpe mung n gawn n sawn ndi ga.
JANUARY 24: KARAI KASANG A CHYAM YU AI LAM
Karai Kasang gaw Abraham hpe chyam yu na nga,...shi hpe wan nat hkungga di nna nawng e...(N.N 22:1-12)

Karai Abraham hpe chyam dat ai lam gaw loi la ai n rai. Asak kaba sayang she lu la ai kasha hpe hkungga nawng jau na matu hpyi sai. Abraham dai hpe n ningdang ai sha tsun ai hte maren galaw sa. Karai gaw shi a kasha Isak hpe sat na hkang n jaw ai sha, Shi nan lajang tawn ai sagu la hpe hkungga nawng jau sai. Abraham hpe Karai hpa majaw chyam a ta? Gara hku chyam a ta? Abraham hta kaning re ai makam, kade daram kaba ai makam nga ai ngu ai gaw Karai chye chyalu rai na re. Rai yang hpa majaw chyam ra a ta? Kata e nga ai n mu mada lu ai makam hpe shinggan de tatut pru wa ai hpe mu lu hkra chyam ai re. Chyam dinglik hkrum ai wa mung grau nna makam hta jat wa na matu, shi kam ai Karai a yaw lajang ai lam hpe tatut chye na mu mada wa na matu yaw shada ai re. Anhte shi a kashu kasha ni hpe mung Karai gaw Abraham hpe zawn chyam chye nga ai. Dai zawn chyam wa yang anhte chye na tawn ra ai lam ni nga na re. (1) Loi ai baw hte galoi n chyam ai (2)Chyam dinglik ai hpe anhte yawng chye na na yak ai rai tim dai hta galoi mung Karai a yaw shada ai lam lawm ai, (3) dai kaw nna lawt lu na hkat mung Karai gaw galoi mung lajang tawn da ya ai wa re (I Kor. 10:13 hpe mung hti yu ga).
JANUARY 25: YEHOWA-YIRE: RA AI HPE LAJANG YA AI KARAI
Sha e wan nat hkungga di na sagu kasha gaw, Karai Kasang shi a matu shi mazing da na ru ai

Kasha hpe wan nat hkungga nawng na bum lung wa ai shaloi, Abraham hpe shi a kasha san dat ai gasan gaw shi hpe tsawm ra hkam sha shangun ai baw gasan re. Hkungga sagu kanang ta? Nga nna san dat ai shaloi, Abraham gaw shi a makam hte bai htai wu ai.Lahta na Abraham tsun dat ai ga a lachyum gaw, Karai lajang ya na re ngu ai lachyum re. Loi ai hku tsun ga nga yang, ma e wa hta mahtai n nga ai, Karai hta mahtai nga ai, an wa Karai hpe kam ga nga ai lachyum re. Kaja wa mung Abraham hkan wa Karai a mahtai hpe lu la manu ai. Anhte a asak hkrung lam hta chyip mak nga hkam sha ai aten? Mahtai kaja n lu ai zawn nga hkam sha ai ten law law nga na re. Dai zawn re ai aten ni hta, mayak a mahtai hpe lu nna hkawm sa na malai, ma hkra mahtai lu tawn ai, lajang tawn ya ai Karai hpe kam let, makam masham hta hkawm sa na gaw grau ahkyak nga ai n rai ni? Yehowa Yire ngu ai lachyum gaw, hkum tsup ai hku lajang tawn ya ai Karai ngu ai lachyum re. Shi ra sharawng ai lam hta sak hkrung ai kashu kasha ni a matu ra ahkyak ai ma hkra hpe lajang tawn, hkyen tawn ya, mahtai kaja hte lam woi nga ai Karai re hpe dum nga ga.

JANUARY 26: SADI SAHKA NGA AI ABRAHAM
Ngai sha hpe dai de nang bai n woi wa ra n ga, sadi nga u.

Abraham asak kaba sai. Kasha Isak a matu ningrum ningtau tam na, shi a kunhting wa hpe shatsam nna Ura ginra de lung wa na tsun sai. Kasha Isak n lawm ai majaw ningrum ningtau tam n lu jang Isak hpe Ura de woi wa mai n mai san ai shaloi, Abraham gaw n mai na re ai lam tsun sai.Hpa majaw rai ta? Kalang mi Karai a ga sadi a majaw pru wa sai mung de bai nhtang shang ai rai yang, dai shara e wa nga mat na tsang ai majaw re. Karai a ga sadi hpe kade kam hpa ai ngu ai hpe ndai hta mu lu ai hta sha n ga, Karai a matsun ai lam kaw nna yit shai mat wa na n ra sharawng ai Abraham kade daram sadi maja ai ngu ai mung dan dawng nga ai. Hpu nau ni e, anhte a sak hkrung lam hta e mung, Karai gaw yaw shada lam hte shaga tawn ai rai nga ai. Ndai mungkan e sakse hku nna asak hkrung na yaw shada let, hkye hkrang la ai chyeju hpe jaw tawn ai hta, ndai mungkan a htung lai masa kaw na pru nhtawm, asak hkrung na ra sharawng ai hpe dum nga ra ga ai. Dai hpe n dum ai rai yang, Karai a yaw shada lam hpe shadik shatup na gaw loi la ai n rai. Dai majaw anhte a myit mang shamu shamawt ai lam hte arawn alai ni hta sadi maja let asak hkrung nga ga.
JANUARY 27: KARAI HPE MAGAM AP AI KUNHTING WA.
...nye madu Abraham a Karai Kasang Yehowa hpe ngai shakawn kungdawn nngai... (N.N 24:48)
Anhte Wunpawng sha ni Abraham a kasha Isak a matu ningrum ningtau tam ai mabyin hpe hti yu nna num la num ya ai hta, anhte a htunghking gaw Israela amyu ni a htunghking hte grai bung ai nga nna tsun shabung arawng la chye ga ai. Bung ai ni mung nga yang nga na re, tim dai ni anhte galaw chye ai lam ni hta Abraham a kunhting hpe kasi la ra ai lam ni law law nga na re. Abraham e shi a kasha a matu ningrum ningtau wa tam na shatsam hkrum ai kunhting wa gaw, kangka ai wa rai nga ai hta n ga, Karai hpe shi a magam tsep kawp ap ai wa mung re. Nnan kaw nna akyu hpyi ap nawng let hpang wa ai. Matut nna mung ap nawng ai hta sha n ga, magam awng dang wa ai shaloi mung Karai a chyeju hpe shakawn wu ai. Ndai hta anhte grai kasi yu la mai ai re. Anhte a magam bungli shagu hpe Karai kaw ap nawng gwi na, ap nawng lu na ahkyak ai. Ka-ang hkup sha ap ai, ap masu nna tinang kam ai hku bai shakre ai, ap nna awng dang wa yang Karai a chyeju n chye shakawn ai lam ni gaw, Karai hte nhtan shai ai lam ni rai nga ai adum nga ga.
JANUARY 28: JAHKRING JAHKRA A MATU
...nye a hpu lat aya hpa di na a ta? (N.N 25:32)

Lahta na ga gaw Esaw tsun ai re. Prang de shan shachyut sa nna wa ai shaloi tsawm ra kaw si ai majaw kanau shadu tawn ai muk hte shapre shat mai hpyi sha wu ai. Kanau gaw na a hpu lat aya hte galai ga ngu ai shaloi, dai hpu lata aya hpa di na, ya ngai si wa nga nngai, nga nna dut sha kau sai.
Jahtum e dai aya kaw nna kaja wa nan hkrat ra mat sai. Jahkring jahkra a matu sha myit nna manu dan ai aya hpe dut sha kau ai Esaw hpe Ga Shaka Ningnan hta angawk ai masha jahpan hta bang tawn ai re (Hebre 12:16). Anhte a asak hkrung lam hta e mung, Esaw zawn ndum shami byin na tsang ra ai. Manu dan ai lam hpe jahkring jahkra myit shadik lu na lam, pyaw daw kadaw na matu manu n rawng ai shing n rai manu n dan ai lam ni a matu galai dut kau ai rai yang myit malai lu na re. Jahkring jahkra a tang pyaw shalai ai lam a matu tinang a hkum hkrang, Karai jaw tawn ai arang, aten, asak, wenyi, atsam majoi n shama na sadi maja ra ai.
JANUARY 29: NHKRU AI HKU HPAJI DAW AI AKYU
...lani jan hta sha nan lahkawng hpe hpa majaw sum lu na ta? (N.N 27:45)
Lahta na ga gaw Rebeka shi a kasha Yaku hpe tsun ai ga re. Kasha marun lu ai Rebeka lahkawng yan hpe maren mara tsaw ra na malai, myi-man lata nna Yaku hpe grau tsaw ra wu ai. Dai majaw Yaku hpe kawa kaw na shaman chyeju masu nna la na hku n hkru n kaja ai hpaji jaw sai. Jahtum e hpa baw akyu hkam sha lu a ta? Shi na myit ru ra sai. Esaw gaw Yaku hpe sat mayu sai. Dai lam Rebeka chye wa ai shaloi myit kahtet nu ai. Jahtum e Yaku hpe jahprawng kau ra sai. Lam mi hku tsun ga nga yang dinghku hta n ngwi n pyaw ai lam dun bang dat ai ga rai sai. Kanu kawa kahpu kanau ni bra ra mat sai. Shada nju ndawng ai kaw kre ra sai. Shi grai tsaw ra ai kasha Yaku mung dum nta hte tsan ai shara de shoi chyum hkawm ra sai. Yaku nan mung shut ai lam re. Tim, dai zawn shut wa hkra hkan n-gun jaw, hpaji jaw ai gaw kanu nan re. Hpu nau wa e, anhte hte seng ai manaw manang dinghku nta masha, makau grup-yin, amyu hte mungdan, hpung urawng ni hta anhte gara hku asak hkrung nga ga ai kun? Mai kaja manu dan ai hpaji ga hpe tsun shaga nna shang lawm asak hkrung nga ga ai kun? Shing n rai, jamjau woi katut ai baw nhkru ai hpaji jaw nga ga ai kun?
JANUARY 30: TINANG HTA BAI RAI WA YANG
Ya, jahpawt rai jang yu u, Lea rai nga lu ai, Yaku gaw.., ndai nang ngai hpe galaw ai gaw hpa rai ta? (N.N 29:25-30)

Yaku gaw kawa hpe masu kau da nhtawm Padan Aram ge de kanu a kayung Laban hpang de wa hprawng nga sai. Katsa Labana a kasha Rahkela hpe yu ra nna, katsa kaw (7) ning tup mayam hku wa nga sai. Rahkela hpe ya na nga nna, jahtum e gaw shi a kana Lea hpe malai masu bang hkungran ya sai. Yaku hkungran poi shani n chye ai, hpan jahpawt she chye nna katsa hpe grai pawt wu ai. Ndai hta Yaku lama chye myit yang gaw, shi a kawa Yaku hpe shi masu kau hpe dum na re. Shi a kawa hpe masu ai ladat hte tsawm ra bung nga ai. Shi gaw kawa hpe Esaw tai masu let shang masu sai. Shi bai masu katut ai mung Rahkela re nga nna Lea malai shang nna masu sai. Kawa hpe masu ai shaloi sagu bainam hpyi dagap nna masu ai. Shi bai masu katut ai gaw Lea a myiman hpe sumpan hte dagap tawn ya nna masu ai hkrum ai (dai aten hkungran num nnan gaw myiman dagap ai). Tim, shi hta grau hkam yak na langai nga ai. Kawa gaw myi n mu sai majaw masu hkrum ai ngu ga, shi gaw myi lahkawng maga akaja sha naw re ai masu katut sai. Shi masu katut yang gaw shi grai n rai dum, grai pawt nu ai. Tinang masha ni hpe maw ai zawn tinang bai maw masu katut yang anhte kaning nga hkam sha chye ga ai kun? Masha hpe lu masu yang grai rai dum ai ni, tinang bai hkam ra yang gaw grai pawt chye ai.Tinang hpe manang ni galaw shangun mayu ai zawn tinang mung masha ni a ntsa e kaja na grai ahkyak nga ai.
JANUARY 31: CHYEJU HTE N GING AI
...Na a mayam hpe nang madun ai chyeju hte sadi mahkra hta na langai mi hpe muk ngai n ging nngai... (N.N 32:11)

Lahta na ga gaw Yaku tsun ai ga re. Shi a madu jan kasha ni hte rau shi a dum nta bu ga de bai nhtang wa ai hkrun lam hta tsun ai re. Karai a chyeju hte n ging dan ai rai tim, shi a a chyeju hkam la sai lam dum hprang nna Karai a chyeju hpe shakawn ai rai nga ai. Shi alai sai prat hpe bai dum nhtang sumru yu dat yang, shi a n gingdan ai lam hte, Karai a mau hpa lakawn ai lam ni hpe nhtang sumru yu nna Karai hpe shakawn ai lam re. Masu magaw ai lam, hpaji daw nna hkalem ai lam ni hte hpring nga ai shi hpe Karai gaw matsan dum lakawn lai wa sai. Kaji kawa Abraham hte Isak hpe tawn da ai ga sadi hte maren shi hpe makawp maga la sai. Karai a sadi dung ai lam hte, matsan dum ai lam ni hpe ndai hta mu lu ai re. Anhte mung Karai a chyeju hpe Yaku zawn dum sumru na ahkyak nga ai. Langai hkrai a lai sai ten hpe bai nhtang sumru yu yang, Karai hkap la ging ai lam anhte kadai hta mung nga na n re,tim ya dai ni du Karai gaw kangka sadi sahka hte nang ngai hpe lakawn nga ai dum hprang mai nga ai. Shi jaw ai chyeju lu sa ga ai majaw, chyeju hte gingdan ai hku asak hkrung na mung grai ahkyak nga ga ai law.