Make your own free website on Tripod.com

ADONIRAM JUDSON

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

adoniramjudsonr2.jpg

Sara Kaba Adoniram Judson a Labau Kadun

Dai Daw Buga. 1788 ning August shata 9 ya shani America mung dan Massachusetts mungdaw Malden ngu ai shara hta shangai dai daw ai re.
Kaji Daw Hpaji Sharin ai Lam . Judson asak masum ning kaw na laika chye hti sai. Kaji nga ten kaw na, manang ni hpe shaga mahkawng la nhtawm naw ku hpawng galaw chyai mungga htawn ai nga nna lahkum ntsa lung, shawa mahkawn hkawn rai chyai chye nga ai. 1804 ning hta Providence ngu ai dakkasu hta madang tsaw hpaji sharin hpang sai, Asak 19 ning hta shi a tsang hta madang tsaw ai hku awng ai majaw shagrau hkrum sai. Dakkasu awng ai hte kaga ni hpe laika sharin ya ai bungli hpang sai. Laika buk lahkawng mung ka shapraw sai.
Galai Shai wa ai Lam. Kaji nga ten hta Karai a magam gun na sharawng ai rai tim, ram prat hta Karai hpe shingdu dat nna hkawm sa ai wa tai wa sai. Rai tim, lana mi manam jarawp kasha langai hta manam nga yang shi yup ai gawk makau na gawk e prat naw ram ai la langai mi machyi kadau nna madai ai nsen hpe na wu ai. Hpang jahpawt dai wa nsa hti mat sai hpe sa mu sai. Dai wa gaw shi grai hkau ai manang nan she rai nga ai lam sa mu kajawng sai, myit grau hkra mat nu ai. Kadun la ai masha asak a lam, manu dan ai asak hpe mungkan a pyaw hpa lam hta aten jahtum ai gaw sum kaba rai nga ai lam ni hpe mu sawn sumru chye la nu ai. Karai hpe shingdu dat ai asak hkrung lam kaw na bai nhtang wa nhtawm, Hkristu hpe shi a hkye la madu hku nan hkap la nu ai. Dai zawn galai shai wa ai hte 1808 ning December 2 ya shani Andover mying ai chyum jawng lung sai.
Sasana Magam a Matu Ap Nawng ai Lam. Galai shai wa ai hte rau kade nna ai hte sasana magam a matu ap nawng ai hku re. Judson hte shi a manang marai mali hku nna sasana magam a matu hpung kasha langai hpaw sai. Shanhte a myit makun ai lam hpe lung nga ai chyum jawng sara ni hpe hpaw tsun dan ma sai. Dai majaw dai chyum dakkasu hte seng ai Congregation hpung hku nna maigan sasana hpung langai hpaw ninghtan sai.
Dinghku Shang ai Lam. December 22, 1789 hta shangai ai Miss Ann ngu ai shayi sha hte February 5, 1812 shani hkungran sai. Dai shayi sha mung sasana magam a matu ap nawng nna sari sadang, nden marai hte hpring ai shayi sha re. Hkungran ngut ai hte February 7 ya shani sasana hkrun lam rawt sai. India mung Culcutta de sanghpaw hte rawt wa ma sai.
Hkalup Tai wa ai lam. India de du na panglai ntsa shata mali na ai re. Dai lapran Chyum mungga hti hkaja nna aten hpe manu dan ai hku aten jai lang ma nu ai. Mungga hkaja ai hta shan hku nna lama mi chye la lu ai gaw, hkye hkrang la hkrum ngut ai hpang galai shai sai lam kumla hku nna hka hta lup hkam nna sakse hkam ra ai ngu ai lam re. Dai majaw India mung Culcutta du ai hte 1812 ning September 6 ya shani Rev. Ward a lata hta shan lahkawng hkalup hkam la ma sai. Hkalup hpung masha tai wa ma sai.
India Mung hta Shara N lu ma ai. Dai aten India mung e nga ai East India Company ni hku nna India de sasana sara ni shang ai hpe kachyi mung nra ma ai. Sara kaba Judson hte madu jan hpe mung gawt shadut ma ai. Hpang jahtum India mung kaw nna Myeng mung de du mat wa ma sai. 1812 ning July 13, ya shani Yangong de du ma sai.
Shakut Shaja Lai Mat wa ai Lam. Myen mung du ai hte shawng daw na shaning ni hta Myen ga hte laika sharin ai hpe madung tawn shakut wu ai. Myen mung de du ai kru ning ngu na 1819 ning June 27 hta shawng nnan galai shai wa ai Maung Naw ngu ai wa hpe hkalup jaw sai. Dai hpang 1824 ning January 23 shani dai aten myen hkawhkam hkaw dung ai Inwa de htawt lung wa ma sai. Myen ni hpe grau ni htep ai hku sasana majen je na yaw shada let dai de du wa ai re. Myen hkaw hkam wa hku nna shi hpe nga shara lamu ga lahpa mi jaw wu ai. Rai tim, English hte Myen ni a majan byin pru wa ai aten hta, sara kaba Judson hpe kinyu re ngu nna htawng rim bang kau sai. 1824 ning June 8 ya shani Aung-pin-lei htawng de sa kau sai. Matsat shabat re ai htawng hta kaga masha ni hte kayau kaya rai sharen da hkrum sai. Shi a lagaw hta pawng (14) daram li nak ai hkang hkyihkyang noi shachya tawn ya mu ai. De a nma hkang gaw shi a galaw hta si ai du hkra lawm mat wa sai re.
Nden Marai Rawng ai Madu Jan. Sharen da hkrum ai sara kaba chyu sha dingsa zingri hkrum ai n rai. Shi a ningrum ningtau sara jan mung yak hkak ai lam amyu myu hkrum hkra wu ai. Sara kaba htawng e naw rai nga yang shi hpe makawp maga yu lajang na masha n nga ai rai tim myit n daw ai sha dang lu ai daram akyu hpyi ap nawng let shakut shaja lai wa sai. Sara kaba htawng e naw rai nga yang shan a ma hpe shangai chyinghkai nu ai. Ana zinli amyu a majaw sara jan mung ganoi noi nsa hti mat lu ai. Sara jan e nden marai hte seng ang ai htawng agyi ni hte up hkang ai ni hpe lu jahkrup ai majaw sara kaba loi mi hkyem sa lu ai re. Machyi kaba a majaw ma hpe shi a chyu n lu jaw ai. Kaga myen num ni kaw mawhpyi zawn hkan hpyi nna she ma hpe chyu lu hpyi jaw ai re.
Lawt Wa ai Lam. Majan tawn nna simsa lam tam na lapran tsap ga byan salang tai ya na matu Myen hkaw hkam wa shi hpe htawng kaw nna shapraw la sai. Rai tim, English hpyen ni bai htu kanawng lung wa ai majaw kalang mi bai htawng de du mat wa nu ai. Shi hpe English hpyen du langai lu mu shalawt dat nu ai. Majan zim nna simsa aten bai du wa ai hte March 21, 1826 shani Yangong de bai nhtang du wa sai. Dai kade nna yang shi a madu jan Hkrsitu hta yup pyaw mat wa sai. 1827 ning April 24 shi a kasha bai n nga mat sai. Madu jan n nga mat ai hpang shi hkrai shingkra hku nna tsawmra ning na hkra Karai a magam gun hpai wu ai. 1834 ning April 10 ya shani Mrs. Sarah Hall Boardman ngu ai sarana sara gaida jan hte bai hta nna sasana magam bai shakut shaja sai.
Myen Chyum Laika. Nyep myiprwi hte rai shaning 21 ning shakut shaja ngut ai hpang 1834 ning January 31 shani Myen Chyum Laika gale ai lam shangut la lu sai. Dai hpe sanit lang nhti nhtang bai hti jep yu nna October 24, 1840 hta gaw dip shapraw na jin jin rai sai re.
Hkam Kaja Lam Ningra wa ai Lam. Asak kaba wa nna sinwawp ana a majaw Calcutta de jahkring mi wa hkring sai. Madu jan mung hkam kaja lam n nga wa ai majaw Calcutta de rau wa hkring nna Myen mung de bai nhtang du wa sai. Dai hpang kade nna yang ma marai kru re ai hta na masum hpe Myen mung e ngam kau da nhtawm America de jahkring mi nhtang wa ma sai. Hkrun lam hta madu jan si mat sai. America mung a Boston mare de ma masum hte 1845 ning October 15 shani du shang wa ma sai. Miss Emily Chubbuck ngu ai jan hte 1846 ning July 11 shani bai hkungran sai. America de woi wa ai ma masum hpe jawng hpaji sharin na matu hti ngam kau da nhtawm madu jan nnan hte Myen mung de bai nhtang ma sai.
Myen Mung Bai Nhtang Du wa ai lam. Bai nhtang du wa ai shaloi mi shawng e ngam da ai ma masum hta na langai si mat sai hpe wa mu chye la lu ai re. Dai hpang kade nna yang Yangong de bai wa lu nga sai. Shani na aten hta Myen-English dictionary lajang nhtawm shana na aten hta kam sham ai ni hte hkrum rai matut shakut sai.
Si Mat ai Lam. Machyi kaba hkrum ai majaw America de nhtang wa tsi la na matu wa ai pang lai hkrun lam hta 1850 ning April 12 shani Madu Yesu hta yup pyaw mat wa sai. Sanghpaw li up agyi wa hku nna shi a moi mang hpe Indian panglai de kabai jahkrat bang kau sai rai.
Matsing: Nyan baw nu atsam kaba nna hpaji kung ai rai tim, shi prat hpe Karai a matu ap nawng let asak hkrung sai re. Shi ndai zawn ap nawng ai majaw ya dai ni Myen mung hta Karai a nhtoi, Karai a mungga chyam bra wa lu ai re. Dai daram shoi chyum nna yak hkak ai lam, manghkang amyu myu hkrum hkra ai rai tim Karai a magam hpe shingdu ndat kau ai. Mungkan ntsa shi a matu kumhpa nnga tim, grin ai sumsing hta myiman pa ai Karai a nchyang langai rai nga sai hpe kadai ningdang lu na rai ta?