FEBRUARY 1-15

HOME
MUNGGA NSHAT
MATSING HPA
MASAT NHTOI NI
MU MADA AI LAM
MUNGGA HPAJI
MAGUP SUMHPA

 
FEBRUARY 1: GALAW KAU AI MARA HPE MALAP LU NA KUN?
...Ngai hpu Esaw a lata na ya ngai hpe hkye la e... (N.N 32:12)
Yaku gaw shi a kahpu Esaw hpe maw sha kau da ai ai ram ram na sai. Shi ning jan sai. Yaku a kasha ni dap pyi grup sai, kasha ni mung kaba sai. Shi lu ai sutgan yam nga mung law la sai. Aten kade na mat wa tim, kashu kasha sali wunli kade law htam wa tim shi a myit hta malap n lu ai hta sha n ga, ya du hkra naw hkrit tsang ai lam langai nga ai. Dai gaw shi galaw lai mat wa ai nhkru ai bungli rai nga ai, kahpu hpe masu sha kau da ai lam re. Asak she kaba dingla mat wa tim shi a kraw hta dai hpe naw dum nna, kahpu hpe naw hkrit nga lu ai. Dai gaw shi tawt lai ai mara a shabri shabrai langai mi re ngu tim n shut ai. Shinggyim masha yawng gaw dai zawn sha rai nga ai. Jahkring mi gan masu kau dat nna prat tup ngwipyaw na shadu ai, na wa jang malap kau lu na shadu nna gan galaw kau dat ai mara gaw tinang a hpang e shingnyip shingna zawn hkan nang nga ai hpe dum ga. Tawt lai hkrup ai yubak lama nga yang mung mara raw ya lu ai Karai kaw hpyi nem let, shawng lam de matut nna dai baw mara hpe koi gam asak hkrung ga law.
FEBRUARY 2: SHA N YIN LA DINGSA
...Yaku ngu ai rai nga li ai...(N.N 32:28)
Yaku shi a dum nta buga de bai nhtang wa ai hkrun lam hta re. Madu jan kasha ni hte dusat yam nga mahkra hp Yabuk hka wora hkran de shawng sharap dat nu ai. Shi hkrai ndai hkran de naw nga nga yang lamu kasa hte gamu hkat sai. Yabuk hka gaw Karai Kasang hku nna Abraham hpe ga sadi tawn da ai lamu ga a jarit e lwi ai hka re. Kawa hpe ...ngai Esaw rai nngai... nga nna masu kau da ai Yaku hpe Karai Kasang sharin shaga ra sai. Masha ningnan shatai la ra ai. Yaku gaw shi a atsam hpe mana maka kam hpa ai wa re. Shi a atsam hte shaman chyeju gyam la lu na hkrai shadu ai wa hpe Karai gara hku sharin shaga a ta? Teng man grin ai shaman chyeju gaw masha a atsam, nyan marai hte gyam la lu ai baw n re ngu ai hpe sharin ya sai. Ngai Esaw re...nga nna masu mat wa ai wa, lamu kasa san ai shaloi... Ngai Yaku re...ngu nna htan ra sai, yin hkam la ra sai. Dai shaloi she Karai gaw shi hpe shaman chyeju hte seng ai lamu ga de jashawn la sai. Masha nnan tai ai Yaku hpe Israela ngu ai mying nnan mung jaw sai. Tsaw ra ai hpu nau wa e nang masha dingsa hku nna naw asak hkrung nga ndai kun? Karai a grin ai shaman chyeju lu la na matu gaw Yaku zawn yin hkam la let shagrit shanyem sit shang yang chyu sha mai byin na re dum nga ga.
FEBUARY 3: BAI DUM HPRANG RA AI LAM
Rawt u, Bethela de lung wa nna dai yang nga nga u; na nhpu Esaw kaw na nang hprawng ai shaloi, nang kaw paw pru ai Karai Kasang a matu tawn hkungri galaw u...(N.N 35:1-5)

Yaku shi a kahpu hpe hkrit nna hprawng ai aten, Karai shi hpe hkrun lam e n-gun jaw la sai. Shaning law law na mat wa sai. Shi Karai hpe hpyi shawn ai hte maren Karai mung shi hpe makawp maga sai. Ya nta buga de bai nhtang wa ai hkrun lam hta Karai shi hpe Behtela ngu nna shi shamying tawn ai shara de bai sa shangun sai. Hpa majaw rai ta? Yaku hpe kalang bai shadum jahprang ai lam mung re. Yaku nan dai shara e Karai hpe ga sadi jaw lai wa ai lam hpe kalang bai dum hprang shangun mayu nna mung re. Yaku gaw shi a atsam hte dai zawn law htam wa ai n rai, Karai e she shalaw jahtam ai ngu ai lam hpe mung kalang bai shadum ai lam re. Dai hta n ga, Karai hpe kalang bai nawku daw jau shakawn shagrau lu na matu mung re. Wenyi lam hta katsi mat, kawp mat ai lam n nga ai sha tut e wenyi hta agrung nga na Karai ra sharawng ai lam mu lu ai. Hpu nau wa e, anhte a prat hta mung Karai gaw Yaku hpe zawn law law lang grai dan dawng ai hku makawp maga lai wa sai re. Yak ai aten hta Karai hpe hpyi jahtau nna, shaman chyeju lu ai aten hta wenyi hta bai kawp mat na n ra ai Karai gaw, nang hpe mung nang hte seng ai Behtela de bai nhtang na matu shadum nga ai, dum u.
FEBRUARY 4: TAWN KAU RA AI LAM NI MAHKOI NGA AI KUN?
Shaloi shanhte gaw tinang lu ai hpara shatsam mahkra hte...wamyi hpun nhpang e lup kau ya mu ai... (N.N 35:4)

Karai a makawp maga bau sin ai chyeju hpe dum hprang lu na matu hte Karai hte kalang bai wenyi hta matut mahkai nawku daw jau lu na matu Yaku gaw Karai matsun ai hte maren Behtela de lung wa na hkyen sai. Dai de lung wa na hkyen lajang ai hku nna Yaku a kun dinghku nta masha ni hpa galaw ma ta? Karai hpe nawku daw jau lu na matu myit masin shajin ma ai. San seng chyoi pra ai Karai hpe myit masin mahkra hte nawku daw jau lu na matu, shanhte hta lawm ai Karai hte nhtan shai ai arung arai, hpara shaje ni yawng hpe shawng kabai kau, lup makoi kau ma sai. De a hpang she Behtela de rawt ma ai re. Karai hpe nawku daw jau shakawn kungdawn ai ni kasi la mai ai lam rai nga ai. Anhte a n-gup aga hte sha Karai hpe nawku daw jau masu ai gaw hkrit hpa kaba, Karai n ra sharawng ai lam nan re. Shi gaw teng man hkum tsup chyoi pra ai Karai rai nga ai majaw, kaja wa teng teng Shi hpe nawku daw jau mayu yang, Shi hte nhtan shai ai lam, Shi matsat ai lam ni hpe kabai kau na, tawn kau na, lup makoi kau na ahkyak nga ai. Shaloi she anhte Shi hpe e teng man ai hku nawku lu na re. Nang ngai hta e Karai n ra ai, Karai hte nhtan shai ai, Shi matsat ai, tawn kau lup kau ra ai hpa baw nga na kun? Myit yu ga. Tawn kau ga.
FEBRUARY 5: KAHPU LIT HPRAI AI RUBIN
Ya ma nnga sai, ngai kaning wa rai na... (N.N 37:30)

lahta na gaw gaw, Rubin tsun ai ga re. Shi a kanau ni Yosep hpe dut sha kau ai hpang tsun ai ga re.
Yaku a kasha marai shi lahkawng hta Rubin gaw kaba dik htum re. Kasha alat re ai majaw hkam sha lu na ahkaw ahkang kaba nga ai zawn, kahpu kaba hku nna gun hpai ra ai lit magam ni mung nga ai re. Yaku sha kasha la kasha ni shanhte a kanau Yosep hpe grai n ju ma ai. Sagu bainam rem ai shara de kawa dat dat nna du sa ai Yosep hpe sat na maw ai. Tim, Rubin n hkraw ai majaw nhkun hta bang tawn ma ai. Ruben n mu ai ten hta ngam ai ni gaw Yosep hpe dut sha kau sai. Kahpu kaba rai nga ai Rubin gaw shi hta kaji ai kanau ni a lata kaw na Yosep makawp maga na lit nga ai rai tim, dai lit hpe hprai sai. Shawng nnan kaw nna Rubin gaw,... ngai nau ni e Yosep hpe n hkra ga... ngu ja ja tsun ra ai re. Tim, shi dai zawn n tsun ai. Tsun gaw tsun hkum tim tang du ai hku n tsun ai. Dai majaw hpang jahtum e Yosep hpe dut sha kau ma ai re. Kahpu kaba rai tim, shi a lit hpe gwi gwi n chye gun ai Rubin a labau hpe yu yang, kawa pyi shi hpe n kam ai lam hpang daw de mu chye lu ai. Dai nang ngai mung, Karai jaw ai shara lama mi hta nga nna lit magma gun ai ni hkrai rai nga ga ai. Kahpu shing n rai kana kun? Kawa kun kanu kun? Shing n rai masha hpe woi awn na lit magma rai kun? Dai lit ni hpe gun ai nang ngai, ang ai hku nna gun hpai nga ga ai kun? Karai jaw ai atsam, shi jaw ai nden marai dat nna ang ai magma hpe n hprai ai sha gun hpai ga law.