SHANING MALI SHI NING HKRUN LAM

 Wunpawng myu sha ni arawng lu ai myu tai let shawng de rawt sa wa lu na matu ahkyak dik gaw hpa rai nga ai kun? Hpyen laknak, hpaji, sut gan, shinggyim ahkaw ahkang lawt lu ai lam ni mahtang rai kun? Anhte Wunpawng myu sha ni tinang a n-gun atsam kam nna shamu shamawt ai mali shi ning rai mat wa saga ai. Anhte a buga ni she krin hkra rai mat wa sai. Sut nhprang ni mung mat wa magang sai. Ahkaw ahkang grau she ginlut kau wa saga ai. Myit mada tawn ailam ni htum mat wa magang sai. Lung seng hkoi magang sai majaw anhte myu sha ni a sut masa madang yawm hkrat wa sai. Hpun kawa ni hpe anhte madu lu ai lam n nga sai majaw jamjau wa magang saga ai. Tinang n-gun atsam hpe hpa manoi nga ga tim myit mada shara grau n nga mat sai. Hpa majaw rai a ta? Mahtai gaw anhte Karai hpe nhtung nhka n tawn ai majaw re. Mungkan a Ja lung seng, sut gan, nhprang, hpaji, hpyen n-gun, laknak ni gaw hkoi mat lu ai. Grin nga lu ai n rai. Dai ni hta manoi nna grin nga lu na n rai. Dai majaw Karai Kasang ngu ai lunghkrung, lungrawk hte yawng mayawng a daju hta mahtang manoi ra nga ga ai. Ja lung seng hta manoi ai majaw ja lung seng ni hpe anhte Wunpawng sha ni madu lu ai lam n nga mat wa saga ai. Ahkaw ahkang lu yang she awng dang na re ngu myit ai lam a majaw anhte ahkaw ahkang hpyi ai shaning mali shi she jan sai mahtai n lu shapraw nga ga ai. Grau she sum mat wa saga ai. Mahtai gaw hpa rai ta ? Karai hpe ja lung seng hta grau nna manu shadan let, Shi hpe tam let tinang a sut gan hku nna kyem da na shawng ahkyak nga sai ngu ai lam re. Shing rai yang she anhte myu sha ni Karai a myi sha tai shajang let Karai a sut gan tai na rai nga ai. Myi man pa ai hte mungkan a ra(need) mara sut gan, hpaji, ahkaw ahkang ni yawng hpe lu la na ra ai. Shk. 33: 11-12 hpe hti let n-gun la ga. "Blessed is the nation whose God is the Lord, the people He has chosen as His own inheritance." Karai Kasang hpe ja lung seng, sut nhprang rai hpe tam sawk ai zawn tam ga. Shi hpe dai ni shaga yang dai ni naw mu lu na ga ai. Anhte Wunpawng sha ni tam nga ai ahkaw ahkang, sut gan, hpaji, hte lam shagu a daju Karai Kasang hpe shawng ningnan myit masin hta lu madu kyem da na ahkyak dik rai sai. Karai hpe ja lung seng sut nhprang rai hta grau manu shadan ga. Mungkan a laknak hta grau nna shareng ga. Mungkan a hpaji hpe grai n hka ja shi yang Shi hpe shawng tam ga. Karai hpe anhte nan myit masin hte tam la mai nga ai. Hpakant lung seng htu ai hta grau mu tam mai ai gaw Karai nan rai nga ai. Myit masin hta Madu Yesu hpe hkap la let Karai a Mungga hta manoi let Karai hpe nhtung nhka shara hta tawn da ga. Dai rai yang Wunpawng myu sha ni shi hte shi rawt jat wa na ra ai. Anhte galaw ai magam bungli ni hta awng dang wa na ra ai. Anhte a ahkaw ahkang lam, sut hpaga lam, hte kaga lam shagu hta ngwi pyaw ai lam hte hpring nna wunli wungau hte hpring tsup let rawt jat wa na ra ai (Shakawn 33:12). Karai Kasang hpe madu ai myu sha ni tai wa saga. Karai hpe kam hpa let magam bungli ni hpe shachyen sa ai ni mahtang tai shajang saga. Shing rai yang ra ahkyak ai lam ni hpe jahkum shatsup ya na ra ai. Mahte 6:30-33 hpe mung hti yu ga. Karai Wa gaw Wunpawng myu sha ni a reng htum ai Sut gan atai nga u ga.