HKRISTMAS LAKSAN

2007 Hkristmas Mungga hpe Jinghpaw hku lawu na ga baw hpe kahtek nna hpaw madat ga.

Hkristmas Mungga (Rev. Bum Seng Li)

Lawu na mungga gaw, Sara Lahpai Zau Ba hku nna 2003 December shata 25 ya shani, Washington D.C makau Centreville kaw galaw ai, America Sinpraw mayan de nga ai Jinghpaw Wunpawng amyu sha ni a Hkrismas poi hta htawn tsun ai mungga re.

Mungga Ga Baw: :Emmanuela = Anhte hte rau rai nga ai Karai

Chyum Daw: : Mahte 1:21-23; Esaia 4:17

Tsaw ra hkungga ai nu wa hpu nau ni, anhte ma hkra gaw Karai Kasang hpe tinang a shangwang shinggan de adawk shapraw kau na dan dan leng leng shakut nga ai aten, prat ladaw hta asak hkrung nga ga ai. Kaga shinggan mungkan de pyi n yu ra ai, Karai a mying gang nna gaw gap tawn ai, "In God we Trust" nga nna npawt nhpang de sharawt wa ai anhte nan shang lawm asak hkrung nga ai America mungdan hpe yu yang pyi grai dan leng nga ai.

Lai wa sai August shata 27 ya shani, Alabama state tara rung ndaw kaw Tara Kanu shi tawk ka tawn ai lungpa hte adawt htu nna, garawt kabai kau sai re. Mung shawa daw tsa mu mada lu ai dan dawng ai shara hta gara makam masham a kumla hpa mi rai rai n mai tawn ai nga ma ai. Laika sharin ai jawng hkan e, dawnghkawn a shawng ga shaka la ai Pledge of Allegiance hta under God nga ai Karai a mying ningsang lawm ai re. Dai hpe unconstitutional nga nna tsun kajai dang rang ma ai. American gumsan magam George Bush hku nna Gay Marriage ngu ai num shada la shada kanawn dinghku shang ai lam hpe ninghkap ai lam tsun sai. Dinghku de shang ai lam hte seng nna shi a ningmu hpe dan dan leng leng tsun shapraw wa ai shaloi adawt dinglun ai ni amyu myu nga tsun ma ai. Shi a makam masham hpe mung masa pinra de dun bang wa ai lam re nga tsun ma ai. Jaw n jaw ngu ai hpe gaw ngai hku hpa wa mi n tsun mayu ai. Tim, ndai zawn re ai lam ni hpe maram yu sawn yu yang, anhte mu mada lu ai dan dawng ai lam langai mi nga ai. Dai gaw kaga n rai, Karai hpe shing n rai, Karai a Mungga shing n rai Hkristu hpe wuhpung wuhpawng a tingwang shinggan de adawt shapraw, mala shapraw na shakut ai lam rai nga ai.

Mai sa Christianity ngu ai Hkristan mungkan shing n rai nawku hpung kata hta e gaw gara hku rai ta? New Hampshire hta e lai wa sai November shata 2 ya shani mungkan hta shawng nnan na Gay Bishop, la shada kanawn ai wa, Gene Robinson hpe Anglican hpung woi hpung up hku nna dang la sai. Hpung up dang ai poi hta shi a hka mat sai madu jan dingsa hte, shi hte ya dai ni du 12 ning kanawn nga ai la wa mung sa du ai da. Dai lam hte seng nna Anglican hpung kata e nan amyu myu kashai wa sai. Dai hta Anglican hpung-up langai mi hpa tsun a ta? nga yang, Prat ladaw galai shai wa ai hta hkan nna ra ai lam hpe jahkum shatsup mat wa ai lam she re nga ai.

Kaga hpung shinggan de na ni Karai Kasang hpe hpung kata de htu anyin bang nga ai ten hta, nawku hpung na ni bai rai jang Karai Kasang hpe hpung a shang wang shinggan de bai adawt mala shapraw nga ai aten nan re.

Hpa majaw ndai zawn Karai Kasang hpe Shi a Mungga hpe adawt shapraw mayu na ta? Lam amyu myu nga ai hta lahkawng hpe tsun mayu nngai.

(1)Karai n lawm tim n ra ai, lawm yang pyi grau dingbai dingna byin ai ngu ai myit jasat a majaw rai nga ai.

(2)Bai langai gaw Karai hpe kam hpa na malai kaga lama ma hpe kam hpa mat ai. Karai a shara hta kaga langai ngai hpe shara jaw kau mat ai majaw rai nga ai.

Ndai zawn re ai aten ladaw hte myit masa hta n gun shaja ya lu ai gaw Emmanuela ngu ai Kasha Karai Kasang sha re. Emmanuela ngu ai a lachyum gaw Anhte hte rau rai nga ai Karai ngu ai re. Lamu kasa hku nna Yosep hpe Mari hpe la n hkum hkrit. Na-um nasin gaw Chyoi pra ai a atsam hte byin wa ai re. Shangai na ma gaw Emmanuela mying ai wa rai na re nga ai. Lamu kasa gaw lai wa sai shaning 2700 ning (B.C 700)daram hta myihtoi Esaia e tau hkrau htoi tsun tawn ai ga hpe bai madi madun ai re. Ndai Emmanuela du pru na ngu ai Esaia a myi htoi htoi tawn ai lam gaw lahkawng lang numdaw nna dik tup lai wa sai Double fulfillment re. Kalang gaw Esaia a lak htak hta nan rai nna, hti hkum lahkawng ngu na grau ahkyak ai dik tup ai lam gaw Yesu shangai wa ai hta dik tup wa ai re.

Amyu lakung 12 ahkum ara rai na B.C 1050 ning daram hta gaw de hpang ai Israela mung dan gaw B.C 930 ning daram hta lahkawng brang ga garan mat wa sai. Lahta mungdaw de lakung (10) lawu mung daw de lakung (2) hte gaw de nna Lahta mung hpe Israela, lawu mung hpe Yuda mung ngu shamying sai. Myihtoi Esaia a lak htak e lahta mung na hkawhkam wa gaw Suri mung na hkaw hkam hte pawng nna Asuri ngu ai mung kaba hpe majan baw ma ai (Asuri mung gaw ya na Saddam Hussein up lai wa sai Iraq ginra re). Lahta mung Israela hkaw hkam gaw Suri hkaw hkam hpe woi nna kahpu kanau mungdan Yuda hpe sa htim ai shaloi dai aten hta hkaw hkam rai nga ai Ahaza gaw Asuri masha ni hpe kam hpa wa ai. Dai zawn re ai aten hta Karai Kasang gaw Esaia hpe dat nna Ahaza hkaw hkam hpe n-gun jaw shangun sai. Esaia hku nna Karai hpe kam hpa na matu tsun nhtawm, Karai kaw kumla hpyi u nga tsun sai. Shaloi Ahaza gaw, Karai hpe gaw n chyam na nngai gaw nga ai. Rai tim shi a myit masin hpe chye ya nga ai Karai gaw Esaia hku nna kumla jaw sai. Shayi hkawn sek hku nna shadang sha shangai wa na re, dai ma hpe Emmanuela ngu shamying na re, dai ma kaja ai hte n kaja ai garai n chye ginghka ai aten hta Ahaza hkrit nga ai hkawhkam lahkawng hkrat sum mat na re nga ai. Kaja wa nan B.C 731 ning hta Suri mung hkrat sum mat sai, B.C. 722 hta Israela mung hkrat sum mat sai re. Ndai lam gaw Esaia a hte Ahaza a prat hta kalang mi dik tup ngut sai. Chyum hpaji chye ai nkau mi gaw Esaia la ai num hkawn sek gaw kasha la kasha lu nna dai la kasha nau wa n lu kaba shi ai aten hta ndai lam ni byin pru sai nga ma ai.

Ahaza hku nna hkawhkam lahkawng hpe hkrit gari nga ai zawn anhte shinggyim masha ni Satan ngu ai Karai a hpyen hpe hkrit gari nga ai aten hta Karai Shi nan Shinggyim hkum hkrang dagraw let, anhte hte rau nga na matu Emmanuela hku nna du sa sai re. Dai ni anhte Emmanuela ngu ai Kasha Karai kaw na lu la mai ai lam ni, Emmanueal anhte hpe jaw ya nga ai lam ni gaw hpa baw rai nga ai kun? Emmanueal jaw ya nga ai lam mali hpe garan kachyan mayu nngai.

1. Emmanuela gaw anhte a hkam sha ai lam hpe chye ya nga ai Karai re. (Understanding)

Ahaza hkaw hkam hte mung shawa masha ni makau grup yin mungdan lahkawng a hpyen hpe hkrit gari nga ai ngu ai hpe Karai chye ya nga ai. Political pressure nga ai hpe chye na ya ai. Dai majaw Esaia hpe dat dat ai re. Dai ni anhte a prat mung dai zawn pressure grai law ai prat re. Political pressure, economic pressure, family pressure, aten shachyut nna asak hkrung ra ai pressure, kashu kasha ni a matu hpaji hte seng nna myit ra ai pressure dinghku hte seng nna myit ra ai pressure law la rai nga ga ai. Hebre laika 4:15 hta hpa tsun a ta? Anhte gaw anhte zawn hkum shan hta asak hkrung ga sai anhte hpe chye na ai hkingjawng lu tawn nga ai. Emmanuela kasha Karai gaw shinggyim hkum shan dagraw asak hkrung yu sai re majaw anhte a manghkang, myit tsang lam ma hkra hpe chye nga ai n-gun la ga.

2. Emmanuela gaw anhte hpe dai ni na matu n-gun atsam jaw nga ai Karai re (Strength for Today).

Yuda hkaw hkam Ahaza hte shi a mung masha ni shanhte a hpyen rai nga ai Suri masha hte Israela masha ni hpe hkrit gari nga ai majaw lahput lagaw kya nga ai aten hta Karai gaw ngai gaw Emmanuela re nga nna n-gun jaw sai.

Ndai hta anhte chye na ra ai lam gaw Emmanuela Karai anhte a manghkang hpe chye ya nga tim dai manghkang ma hkra hpe kalang lata n la kau ya ai. Dai myit ru myit yak hpa lam hte tang ai n-gun mahtang jaw nga ai. Yosep a asak hkrung lam hpe yu ga, Emmanuela ngu ai Karai shinggyim hkum hkrang sa hkam la na lam hta kawa langai a lit la na hpe lamu kasa shi hpe tsun sai. Tim, dai lit hpe la nna Mari hpe makawp maga woi awn mat wa ai shaloi she yak hkak ai lam amyu myu hkrum sai. Ma Yesu hpe hprawng makoi hkawm ra ai. Ngai hpe n-gun lagaw shaja ya ai wa a majaw lam shagu hpe ngai hkam lu nngai nga ai Kasa Pawlu hte rau Emmanuela hta n-gun la ga.

3. Emmanuela gaw anhte hpe hpawt ni na matu myit mada lam jaw ya nga ai. (Hope for Tomorrow)

Karai Wa gaw Ahaza hkaw hkam hte Yuda mung masha ni hpe n-gun atsam jaw ai hta n ga, lani mi na aten hta nanhte a hpyen ni hten bya mat na re nga ai myit mada lam mung jaw ya sai. Dai majaw Asuri ngu ai mung kaba hpe myit mada na malai, Ngai hta e myit mada nga mu, ngai chyu nanhte a myit mada shara re nga nna tsun shadum sai.

Dai ni anhte a myit mada ai lam gara hta gaw gap nga ga ai kun? Hpaji byeng-ya hta kun? Magam bungli hta kun? Arawng aya hta kun? Tinang a bawnu atsam hta kun? Ja gumhpraw hta kun? Mung masa lam hta kun? Ndai lam ni gaw anhte a matu grai kaja ai lam ni gaw rai na re. Tim, ndai lam ni gaw hpawt hpra ni a matu kaja dik ai myit mada shara gaw n rai na re. Ndai lam ni gaw shamu shamawt chye ai galai shai chye ai. Hten mat chye ai run mat chye ai lam ni re.

4. Emmanuela gaw Htani Htana Hkye Hkrang la ai Lam Shing nrai Htani Htana asak jaw nga ai Karai re. (Eternal Life)

Karai gaw Yuda masha ni hte hkawhkam Ahaza hpe hpyen ni a lata hkye hkrang la na gaw Asuri kaw na n rai, Yehowa Karai sha rai nga ai lam shadum sai. Dai hte maren anhte shinggyim masha ni hpe yubak kaw na hkye hkrang nhtawm htani htana asak jaw ya lu ai gaw Emmanuela Karai sha rai nga ai. Emmanuela Karai jaw ya nga ai lam ni hta kaba dik htum ai ahkyak dik htum reng dik htum ai gaw Htani htana asak re

Shinggyim masha gaw Adam a majaw yubak kap ai ni tai mat sai rai nna, Ngarai hte sha ging dan mat sai ni rai saga ai. Karai a hpyen tai mat nna kanu a hkritung kaw nna nan yubak hpring ai ni rai saga ai. Ngarai kaw na lawt lu na matu tinang a atsam hte gara hku nna mung nmai byin sai. Dai zawn re ai shinggyim masha ni hkye hkrang la ai lam hpe lu la na matu, Karai nan anhte hpe hkan tam la ra sai. Chyum laika hta tsun ai gaw Asai n hkaw yang mara raw na lam nnga sai nga ai dai zawn asai hkaw lu na matu, Wenyi rai nga ai Karai gaw shinggyim hkum hkrang dagraw hkam nna Yubak a shabrai hpe wa kau ya na ra sai. Karai gaw Emmanuela hku nna masha hkum hkrang hkam la ra sai. Emmanuela wudang ntsa e si hkam ai shaloi NGUT MA SA LI AI nga nsa hti mat wa ai re. Bungli ngut boi sai Greek ga hku Tetelestai nga ai. Yubak a shabrai hka wa ya sai. Shinggyim masha ni a daw hta shanhte a atsam hte n lu wa ai hka hpe ngai ma hkra tsep kawp wa kau ya sai ngu ai lachyum re.

Nang ngai anhte a atsam, ding hpring ai lam hte n lu mari ai htani htana asak hkye hkrang la ai lam a matu Emmanuela mari ya sai. Dai shi mari da ngut sai HTANI HTANA ASAK HPE ANHTE HPE KUMHPA HKU NNA JAW NGA AI RE. Dai majaw hkye hkrang la hkrum ai lam gaw makam masham hte sha re (Ehpesu Laika 2:8-10 hta hpa tsun a ta?)

Kaning rai nme law makam masham a marang e chyeju hte sha nanhte hkye hkrang la ai hkrum manit dai nga ai re...dai gaw nanhte kaw na nrai, magam bunglu hku nna mung nre nga bai kahtap tsun nga ai. Karai a kumhpaw kumhpa re nga ai.

Dai kumhpa hpe anhte hkum ding dek lu saga ai kun?

Htani htana asak hkye hkrang la ai kumhpa hpe lu saga ai ngu ai mung ya ndai mungkan e naw asak hkrung nga ai ten hta chye nan chye mai ai. Yawhan a shagun dat ai laika Langai daw kaba 5:12 hte 13 hta Dai Kasha hpe lu ai wa gaw asak hpe mung lu nga ai, nga ai bai 13 hta Karai a amying nsang hpe kam sham ai nanhte gaw nhtum nwai asak lu na manit dai nanhte chye myit ga ndai lam nanhte hpe ka dat ma sa de ai. nga ai. Htani htana asak lu sai chye na matu re nga ai...Nang ngai hkrak chye nga saga ai kun?

Dai ni Hkrismas shani ndai mali gaw grai ahkyak na re. Emmanuela ngu ai anhte hte rau rai nga ai Karai jaw ya nga ai ndai mali hte lu la let asak hkrung ga.

Hkum ding dek a asak hkrung lam ndai mali hte gaw gap ga, anhte a kun dinghku ni hpe ndai kumhpa mali hte gaw gap ga, anhte a wuhpung wuhpawng hpe ndai mali hte shangang tawn ga. Emmanuela gaw anhte a shingbyi wahpang, ngang grin ai lunghkrung rai nga ai. Adum nga ga.

Yubak kap ai ni hpe hkye hkrang la na matu mara, Hkristu Yesu gaw mungkan ga de du ra ai, nga ai ga gaw, kangka re ai hte kaja wa hkam la ging ai ga rai nga ai (I Tim 1:15).

Hkristmas hte seng nna chye na shut ai lam ni.

1. Sinpraw mung na Hpaji rawng ai ni marai masum nan re nga ai lam gaw n teng ai. Kade re ngu ai hpe Chyum laika hta hkrak n tsun tawn ai. Masum rai yang rai na n rai yang n rai na.

2. Sagu rem ai ni Yesu hpe sagu sa sak jaw ai ngu nna nkau mi tsun chye ma ai. Chyum laika hta dai hte seng nna hpa n tsun tawn ai. Masha e tak sawn la ai she re.

3. Sinpraw mung na hpaji rawng ai ni Yesu shangai ai shana e nan Yesu hpe mu tam ai ngu ai hku nna masha malawng maga sawn shadu chye ai. Mahte daw kaba lahkawng hpe atsawm hti yu yang ndai lam n jaw ai hpe mu lu na re.

4. Yesu gaw manam jarawp hta shara n nga ai majaw dumsu ulawng hta shangai ai ngu nna chye na shut ai lam. Yesu hpe ushat wakang hta bang tawn ai gaw teng tim, masha n nga ai dumsu ulawng sum hta shangai ai ngu ai gaw shut ai lam re. Dai aten na Yuda masha ni nta shachyaw yang dumsu ulawng hpe kaga san re ai sum hku nna n gap ma ai. Masha nga ai nta kaba a daw chyen mi hta dumsu hte kaga du sat ni hpe tawn da chye ma ai. Masha nga ai daw hte du sat ni hpe tawn ai shara gaw nta kaba langai hta sha rai nga ai. Dai majaw Yesu gaw san san gap tawn ai ulawng hta shangai ai ngu ai gaw n teng ai.

The History of Christmas

No one knows the exact date of Christ's birth, but most Christians observe Christmas on December 25. The word Christmas comes from Cristes maesse, an early English phrase that means Mass of Christ.
The story of Christmas comes chiefly from the Gospels of Saint Luke and Saint Matthew in the New Testament. According to Luke, an angel appeared to shepherds outside the town of Bethlehem and told them of Jesus' birth. Matthew tells how the wise men, called Magi, followed a bright star that led them to Jesus. The first mention of December 25 as the birth date of Jesus occurred in A.D. 336 in an early Roman calendar. The celebration of this day as Jesus' birth date was probably influenced by pagan festivals held at that time. The ancient Romans held year-end celebrations to honor Saturn, their harvest god; and Mithras, the god of light. Various peoples in northern Europe held festivals in mid-December to celebrate the end of the harvest season. As part of all these celebrations, the people prepared special foods, decorated their homes with greenery, and joined in singing and gift giving. These customs gradually became part of the Christmas celebration. In the late 300's, Christianity became the official religion of the Roman Empire. By 1100, Christmas had become the most important religious festival in Europe. The popularity of Christmas grew until the Reformation, a religious movement of the 1500's. This movement gave birth to Protestantism. During the Reformation, many Christians began to consider Christmas a pagan celebration because it included nonreligious customs. During the 1600's, because of these feelings, Christmas was outlawed in England and in parts of the English colonies in America. The old customs of feasting and decorating, however, soon reappeared and blended with the more Christian aspects of the celebration.

Masha Hpan Amyu Myu

1. Yosep: Yosep gaw ding man ai wa, shi mahtan tawn ai Mari a sari makawp maga ya ai wa re. Karai a matsun ga hpe n shut n shai madat mara ai wa, makam masham hte hkawm sa ai wa re. Kang ka sadi sahka re ai wa mung rai nga ai. Dai majaw Karai nan masha sa tai ai mabyin mahkrun hta jai lang hkrum sai.

2. Mari: Sari sadang rawng ai shayi sha re. N gwi la ai rai tim, Karai lajang ai lam hta makam masham hte hkan nang hkan sa ai shayi hkawn sek re. Shayi sha ni kasi la mai ai hkawn sek rai nga ai.

Dai ni na ramma shayi shadang sha ni hpe yu ai shaloi, Karai a lam mungga a lam hta makam masham hte hkrak kangka sadi sahka, sari sadang hte rai asak hkrung ai ni mung nga nga ma ai. Rai tim yawng gaw n rai na nhten!. America mung na ramma ni hpe masam maram yu ai shaloi Karai nga ai lam kam ai gaw 11%, sha rai sai nga ai. Chyum Laika gaw Karai a Mungga nan re ngu kam ai gaw 1.2% sha rai sai nga ai, yawn hpa kaba re.

3. Hpaji Rawng ai ni. Hpaji arawng lu ai ni rai ma tim myit tsaw myit dap ai lam n nga ai. Ahkying aten, atsam marai hte tinang lu tawn ai sut atsam hpe ap nawng let dai hkye la Madu hpe mu hkra tam naw ku daw jau ma ai.

Dai ni hpaji machye machyang kung ai ni hta masha hpan lahkawng mu mada lu na re. Karai hpe nyet ai ni hte, moi na hpaji rawng ai ni zawn tinang a hpaji machye machyang hpe n shamyet ai sha Karai hpe kam let asak hkrung ai ni, Karai a matu asak hkrung ai ni mung nga ma ai. America mung na hpung tang hpaji ninghkring ni hta 55% gaw Karai nga ai lam kam ma ai da.

4. Herod Hkawhkam. Yesu shangai sai lam chye ai hte, shi a arawng aya, ahkaw ahkang hte magam tingnyang shamat kau na grai tsang ai wa re. Yesu hpe tam mu jang shi hpe mung wa tsun dan u, ...ngai mung shi hpe sa naw ku lu n ga.. nga nna hpaji rawng ai ni hpe tsun wu ai. N gup aga kaw na gaw Karai hpe hkrit kamyin ai zawn rai tim, myit kata hta Yesu hpe n ra ai, hkrit ai, n ju n dawng ai wa rai nga ai.

Dai ni masha nkau mi Karai a lam, naw ku makam masham a lam hpe hkrit nna, tinang a arawng aya sut gan ahkaw ahkang hpe hkrai manat tek jum tawn mayu ai ni nga ai re. Dai zawn re ai ni gaw Hkristu hta grau nna mungkan a arawng sadang hpe ra tsaw ai ni rai nga ai.

5. Hkinjawng agyi hte Laika Ka ai Sara ni. Yuda mung a naw ku htung hpe woi awn ai ni, Karai a mungga laika hpai ai ni rai nga ma ai. Hkawhkam wa sagawn ai Yesu shangai na shara hte seng nna hkrak hkrak lu htai ma ai. Chyum laika hpai nga ninglen, naw ku htung hpe woi awn ai ni rai nga ninglen Karai a mungga hta Herod a daru magam hte shi a ga hpe grau hkrit ai ni rai nga ma ai. Mungga nan hpai da nhtawm, Yesu hpe mu la ai lam, naw ku ai lam hte Herod hpe mungga hte hkrak shadum jahprang ai lam n nga ma ai.

Dai ni na aten hta mung shanhte zawn re ai ni nga nga ma ai. Chyum Laika hpai nga ninglen, hpung magam gun, Chyum dakkasu sara rai nga ninglen, Yesu hpe nyet ai, Karai hpe hkrit na malai ti nang hpe shagrau na masha hpe grau hkrit ai ni nga ai. Chyum laika gara daw hta hpa rawng ai hkrak hkrak chye tsun chye htai tim, Hkristu hpe Madu n shatai, Mungga hpe dinglun htai lai re ai ni nga ai re. Hpung shing n rai, naw ku htung hta ningbaw tai nga ninglen, Mungga hte nhtan shai wa ai lam hpe gwi gwi n lu tsun, masha a myiman tau nna tinang nga mai lam a matu sha hpung magam lam hpe gun jahpai ai gaw Karai a man hta matsat shabat rai nga ai.

6. Sagu rem ni. Hpaji hte arawng aya kata re ai ni rai nga ma ai. Lamu kasa ni sa tsun dan ai majaw Yesu shangai sai lam na chye la lu ai ni re. Yesu hpe mu hkra tam nna, Karai a chyeju shakawn let, Yesu a lam kajai sakse hkam ma ai re.

Dai ni na aten hta e mung dai sagu rem ni zawn re ai ni law law nga nga ai re. Arawng aya n lu ai rai tim Karai a matsan dum la ai chyeju hpe hkam la lu nna Hkristu hpe hkye la Madu hku hkap la let, Shi a lam hpe ti nang mai byin ai maga hku nna sakse hkam nga ai ni mungkan ntsa e mun mun sen sen nga nga ma ai.

Dai ning a Hkristmas ten hta ti nang kaning re ai masha hpan hta lawm nga ai kun? san jep yu ga saw shaga dat ai.

Fear Not

In the Christmas narratives, there are several fear nots.

1. The fear not of salvation: And the angel said unto them, Fear not: for, behold, I bring you good tidings...which shall be to all people. For unto you is born this day in the city of David a Savior, which is Christ the Lord (Luke 2:10,11).

2. The fear not of the humanly impossible: Fear not, Mary, the Holy Ghost shall come upon thee, and the power of the Highest shall overshadow thee: For with God nothing shall be impossible (Luke 1:30, 35, 37).

3. The fear not of unanswered prayer: Fear not, Zacharias: for thy prayer is heard; and thy wife Elisabeth shall bear thee a son, and thou shalt call his name John (Luke 1:13).

4. The fear not of immediate obedience: Joseph, thou son of David, fear not to take unto thee Mary thy wife. Then Joseph did as the angel of the Lord had bidden him (Matthew 1:20,24)

Source Unknown

Hkristmas Hte Seng ai Matsing Hpa Kadun Kadaw

December 25

Yesu gara ten hta shangai ai ngu ai hpe kadai hkrak n chye ai. December 25 shani Hkristmas nhtoi masat nna galaw ai lam gaw Karai hpe n chye ai tara maigan ni a poi ni kaw na len la ai lam re hpe sagawn tawn ma ai. Lai sai ten Europa Dingdung daw na amyu masha law law wa Yule ngu ai poi kaba hpe nshung ta hta galaw chye ma ai. Dai poi gaw nshung ta jahtum maga de Jan bai tsaw lung wa ai aten hpe masat dingsat hku la nna, Jan hpe shagrau ai poi re. Moi na Roma masha ni a Saturnalia ngu ai poi gaw hkai lu hkai sha ai hta nsi nai si ja kat shangun ngu nna shanhte sawn la ai Saturn ngu ai nat hpe shagrau ai poi rai nga ai. Ndai poi kaba lahkawng hpe nshung ta a jahtum daw hta galaw ma ai. Ndai poi ni a len la nna Hkristan nkau mi Yesu a shangai wa ai poi hpe nshung ta hta galaw hpang ma ai re nga ma ai. Hpung a labau hpe yu ai shaloi Christmas poi galaw ai lam hpe kaga nat jaw jau ai ni a poi hte kayau gaya re ai lam ni nga lai wa ai majaw, nkau hpung ningbaw ningla ni hku nna ndai poi hpe pyi pat hkum lai wa ma sai.

Christmas Cards

John Calcott Horsely ngu ai wa gaw 1843 hta Hkristmas Card galaw na shawng myit shapraw sai. Dai wa gaw, 1846 ning hta Christmas card 1000 shawng dip shapraw nna dut hpang sai.

Christmas Hpun

Karai hpe n chye ai tara maigan masha ni a lailen hpe hkan nang galaw ai kaw na hpang ai re. England ga na Druids ngu ai masha ni gaw laning mi hta kalang, nshung ta hta tsit tsawm ai hpun ni hpe naw ku ma ai. Tsit lali ai hpun gaw grin ai asak jaw ya lu ai ngu kam ma ai majaw re. Bai moi na Roma ni a prat ladaw hta hpun hpan amyu mi hpe mayat maya shangun ai atsam rawng ai ngu kam nna naw ku ma ai. Dai majaw laning mi hta kalang dai hpun hpan hpe wan shachyi mawn sumli rai daw jau ma ai. Dai zawn re ai labau nga lai wa ai rai tim, dai ni na Hkristan ni gaw dai hpe kaga mi n sagawn sai sha Hkristmas ten a masat masa langai hku nna Hkristmas hpun mawn chye ma ai. Rai tim, dai ni mung Hkristmas ten hta tinang mawn sumli ai hpun hpe Karai hta grau ahkyak tawn ai rai yang moi na hpun naw ai tara maigan ni hte hpa n shai na re.

Caroling

St. Francis of Assisi ngu ai wa Italy mung e jaw prat 13 hta hpang dat ai magam re. Shinggyim hkum hkrang dagraw hkam ai Hkristu hpe shagrau ai hku nna hpang wa ai mahkawn shakawn ai lam re.

X'mas
Christmas hpe X'mas ngu nna mung ka chye ma ai. Greek laika hku nna Hkristu a mying jahtuk yang shawng na laika kanu gaw X re dai hpe la nna X'mas ngu kadun ai hku ka ai re.

2001 Christmas Jahpan

Lai wa sai shaning Christmas jahpan hpe yu yang lawu na hte maren mu lu ai.

Christmas Accident 120,000

Christmas Card 650,000,000

Christmas Hpun 450,000,000

Christmas Kumhpa 850,000,000

Christmas hpaga amyat $ 18 Billion

Christmas hta nang hpam malu masha lu/sha hpang ai ramma 1,850,000

Hkristu hpe n chye ai sha Christmas poi shang ai masha yawng wan 4000 daram

Christmas a majaw bya mat ai dinghku 1,200

Christmas a majaw si ai masha 2,800

Our Greatest Need

If our greatest need had been information, God would have sent us an educator;

If our greatest need had been technology, God would have sent us a scientist;

If our greatest need had been money, God would have sent us an economist;

If our greatest need had been pleasure, God would have sent us an entertainer;

But our greatest need was forgiveness, so God sent us a Savior.