HKRISTAN HTE JA GUMPHRAW

Chyum laika hta, Ja gumhpraw hte seng nna sharin matsun da ai lam yawng (2350) lang mu lu ga ai. Ja gumhpraw hte Hkristan asak hkrung lam matsun nkau hpe hkaja yu ga.
1. Karai Kasang gaw, anhte ra ai ma hkra hpe shaman ya na ga sadi jaw da ai. "Nye a Karai Kasang chyawm gaw, shi sut gan su nga ai hte maren, Hkristu Yesu hta e hpung shingkang hte nanhte a ra mara hte hpe jahkum shatsup na ma rin dai" (Hpilipi 4: 19). Shi a kashu kasha ni Ja gumhpraw jai lang ra ai hpe Karai Kasang chye nga ai. Raitim Hkristan law law gaw, ja gumhpraw jai lang ai hta, Karai a ra sharawng ai hpa re hpe n chye ai sha tinang myi hte mu ai hku jai lang kau chye ga ai.

2. Karai Kasang gaw, yawng hpe (anhte a ja gumhpraw mung lawm ai) madu up hkang nga ai. "Sumsing lamu hte ginding aga hta e, nammukdara hte sung la ai shara shagu e, Yehowa hpa mung galaw mayu ai hte maren, galaw nga ai"(Sh.K 135: 6).

3. Ja gumhpaw hte arai yawng mayawng hpe Karai Madu ai. "Lamu ga hte de a yawng mayawng hte, mungkan ga hte dai hta shanu nga ai ni nlang hte hpe, Yehowa madu nga ai" (Sh.K 24:1). Madu Yesu gaw, yawng mayawng a nhtung nhka re (Kolo 1: 16-17).

Anhte a gumhpraw hpe dum hta ap da ai shaloi tinang a mying hte ap da ga ai. Raitim teng sha tsun ga nga yang, anhte a ja gumhpraw n rai. Madu Karai a ja gumhpraw hpe anhte jai lang nga ai she re. Ja gumhpraw sha n rai anhte a hkum hkrang hte anhte lu da ai arung arai yawng mayawng hpe Madu Yesu madu nga ai. Anhte ja gumhpraw jai lang ai shaloi anhte a myit kata hta, "Madu a ja gumhpraw hpe jai lang nga ai" ngu myit dum let, jai lang nga ga ai kun?

Dai rai yang anhte madu ai hpa rai na rai ta? Anhte gaw, yawng mayawng hpe madu da ai madu Karai Yesu Hkristu hpe nan madu da ai ni rai nga ga ai. Madu hta, yawng mayawng hkum tsup ai hpe kam ai, chye ai mayam wa gaw, hpa hpe mung n tsang ai sha asak hkrung nga lu na re. Yesu tsun ai "Hpawt ni na matu myit hkum tsang myit, hpawt ni gaw shi a matu tsang na ra ai"... nga ai. (Mahte 6: 34).

Anhte a Ntsa Karai Myit Mada ai lam.

1. Karai gaw shi a kunhting kaja ni tai let ja gumhpraw hpe jai lang na ra sharawng nga ai. Kunhting kaja ngu ai gaw tinang a madu a ja gumhpraw hpe hpajang ai mayam re.

2. Kangka ai kunhting kaja ni tai na hpe Karai ra sharawng ai. "Dai hta kaga kunhting ni gaw, kangka nga yang she, masha e ra ai hku rai nga ai" (I Kor 4: 2).
3. Anhte Karai a kunhting kaja ni tai ai shaloi,
a). Karai Kasang hte grau ni htep wa lu na ga ai.
b). Hkristu hte bung ai sak hkrung lailen hta grau hkawm sa lu na ga ai.
c). Ja gumhpraw lam hta, myit grau ngang kang ai hku chye jai lang wa na ga ai.

Anhte ja gumhpraw hpe jai lang ai myit jasat gaw, Karai Kasang hte anhte a lapran matut mahkai nga ai wenyi sumri hta ahtu hkra nga ai. Karai ra sharawng ai kunhting myit jasat hte jai lang chye ai rai yang, Karai Kasang hte mung grau ni htep wa lu na ga ai. Shut shai ai myit jasat hte jai lang ai rai yang, anhte a wenyi sak hkrung lam mung Karai hte grau tsan gang wa na re. Karai Kasang hte ni htep ai hku hkawm sa lu ai nan sutgan kaba rai nga ai (Hpil 3: 10-11).

Madu Yesu gaw, "na a sutgan nga ai kaw, na a myit masin mung nga na lit dai" nga ai (Mahte 6: 21). Anhte Hkristan ni a sutgan gaw, ja gumhpraw rai yang, anhte a myit masin dai ja gumhpraw kaw maju jung nga na re. La ma Karai Kasang gaw, na a sut gan re nga yang na a myit masin Karai Kasang kaw, maju jung nga na re. Na a sut gan ja gumhpraw kun? Karai Kasang kun?

Ja gumhpraw gaw, Hkristan ni a wenyi asak hkrung lam hta, Madu Yesu a npu hta taw let, asak n hkawm lu hkra, dingbai dingna jaw ai kaga madu langai zawn tai wa chye nga ai. Hkristan law law wa ja gumhpraw n lu, naw matsan ai shaloi, Karai hte grai ni htep ai hku hkawm sa lu ma ai. Rai tim, ja gumhpraw lu lawm wa ai shaloi she, Karai hte grau tsan gang ai wa ma ai. Dai gaw, Madu Karai hpe shayawn ai sak hkrung lam rai nna, ja gumhpraw gaw, dai Hkristan a madu tai mat nna, ja gumhpraw sut su ai wa gaw, ja gumhpraw a mayam tai mat ai sakse rai nga ai. Mungkan masha law law gaw, ja gumhpraw hpe Karai shatai nna sak hkrung ma ai. Ja gumhpraw hpe Madu shatai ai wa gaw, Karai kasang hpe tinang a sak hkrung lam a madu mung n shatai lu na re. Dai majaw, Madu Yesu gaw, masha langai gaw, madu lahkawng kaw, nchyang n mai chyang nga ai." Kadai rai ti mung madu lahkawng kaw chyang lu na n rai; shi langai mi hpe ndawng nna, kaga hpe tsaw ra na wu ai. Nanhte Karai Kasang hpe mung, mungkan a sut gan hpe mung, rau chyang lu na myit dai n rai" (Mahte 6: 24).

* Myit yu na lam: Na a ja gumhpraw gaw, nang hpe Karai Kasang hte grau ni htep wa shangun nga ai kun? Shing n rai Karai hte grau tsan gang kau shangun nga ai kun?