HKYE LA AI CHYEJU HPE N GAWN N SAWN DI GA YANG
HTI NA MUNGGA; Heb 2: 1-3; 3:19; Mht11:28-29, Yh 6:47

Na a asak hkrung lam hta yakhkak hkam jau nga ai manang langai ngai hpe san seng tsaw ra ai myit hte garum la ai na a garum kumhpa hpe shi nhkap la, ningdang kau hkrum ga ai kun? Dai aten hta na a myit masin hta gara hku hkam sha na ta?

Madu Yesu a hkye la ai chyeju mung dai hte bung nga ai. Anhte a Yubak mara hta lup nga ai hpe shi mu ai, chyena ai, hte dai yubak tsinyam kaw na hkyela mayu ai majaw sha, tsaw ra myit san san hte wudang ningtsa si hkam ya sai re. Anhte a atsam hte yubak ningsin kaw nna asak ninghtoi de gara hku mung nmai du wa ai, anhte a tara shadik ai magam bungli hte gara hku mung sumsing kashu kasha ni nmai tai wa ai majaw, yubak mara a manghkang kaba hpe yubak lu ai shinggyim masha ni gara hku mung nmai hparan kau lu ai kajaw, Madu Yesu shi nan si hkkam hkye la sai re. Madu Yesu a hkye la magam bungli gaw ra nrawng hkum tsup sai. Wu dang ntsa si hkam ai hkye la a magam bungli hpe bai hkrung raw tai hte jahkum shatsup ya sai. La ma Madu Yesu gaw wudang ningtsa si hkam, lup hkam nna, bai nhkrung rawt ai rai yang shi a hkye la a magam bungli mung daw chyen sha rai nna, anhte mung shi hpe kam sham ai tim yubak mara nlawt ai sha nawku htung lai len hte naw shakut nga ra na re (I. Kor 15: 14-19). Madu Yesu gaw, bai hkrung rawt ai hpang hpa majaw sumsing lamu de galang ta n lung wa ai sha mungkan ga ntsa hta hpa majaw nhtoi (40) ya naw nga nna shi gaw hkrung rawt sai lam sak se Madun nga a ta? Mahtai gaw, anhte hpe hkyela ai magam amu gaw hkum tsup sai hte ngai hpe kam sham ai ni yawng ngai zawn si ai hpe nhkrit ra sai, hpung shingkang hte hpring ai hkumhkrang hte lani mi bai hkrung rawt na re, ngai gaw yubak lu ai ni kam sham naw ku ging ai asak Madu, hkyela lu ai wa re hpe sakse Madun mat wa ai re.

Manang wa nang hpe hkristmas kumhpa lama ma jaw ai shaloi, nang hta lata la na lam (2) sha nga ai. Dai gaw (a) kumhpa hpe hkap la na kun? (b) Kumhpa hpe ningdang kau na kun? Madu a hkyela ai magam gaw, hkumtsup sai hte ngag kang ai sakse ni mung law law chyum laika hta Madun da ya sai majaw, yubak lu ai anhte gaw, dai hkyela ai chyeju kumhpa hpe hkap la na (shn) ningdang kau na kun? Langai ngai hpe daw dan ra sai. Kadai mung dai Madu Yesu hpe hkye la Madu ngu myit masin hta hkap la kamsham ai rai yang hkye la hkrum na ga sadi jaw da sai (Rom 10:9-10). Shi hpe kam sham ai kadai mung htani htana asak hpe lu la na re (Yn 6:47).

Hpu nau wa a sak hkrung lam hta Madu Yesu a hkye la ai chyeju dazik hpe lu la sai kun? (shn) lani mi hkyela hkrum na nhten ngu nawn wam re makam hte naw ku htung tara hta naw shakut hkiba nga ai ku? Madu Yesu hkye la ai magam gaw ngut sai, hkumtsup sai, majaw anhte shakut nra sai. Madu wudang ningtsa hkye la ai magam gaw, anhte hpe KARUM LA ai amu nre, anhte hpe HKYE LA ai she re. Madu a hkyela ai chyeju kumhpa hpe naw ningdang nga ai wa rai yang Madu na ntsa grai yawn nga na re. Hpu nau wa, teng sha hkye la hkrum lu sai kun? Tinang a makam masham hpe bai dinglit yu ga.

***Myit yu na lam: Karai galaw ai hkyela ai magam hta nhkum tsup na hpa naw nga ata?

Kyu hpyi ga: Madu hpe kam sham nngai. Madu e ngai hpe hkye la rit.