ASAK WENYI SUM MAT YANG
HTI NA MUNGGA: MK.8:36

Lai wa sai lahkawng ning hta miwa mung sasana ginra de du hkawm let, Madu Yesu a hkyehkrang la ai kabu gara shi ga lam hkaw tsun sakse hkam du hkawm nngai. Kahtawng langai kaw du yang , shangai nhtoi gu sai Mahkum hte re hpawmi langai mi a nta de kyu hpyi ya na matu du shang mat wa ga ai. Nta Madu jan a kyu hpyi gabaw a majaw nye a myit hta grai hkam sha mat ai hte gara hku akyu hpyi ya na pyi n chye mat nngai. Nta Madu jan a kyu hpyi ga baw gaw; "... ndai ma hkum hpe atsawn sha jahkrat kau lu na matu kyu hpyi garum ya marit" .. nga ai. Hpa majaw nga yang, mungdan asuya a tara hte ninghtan shai ai ma hkum hpe madu da ai majaw m, tsi rung de ma jahkrat kau ra ai re lam tsun dan wu ai. (Asuya tara hte maren. Dinghku langai hta ma 2 hta n mai jan ai). Hkritung na ma hpe shangai la lu na matu myit mada shara langai sha nga ai. Dai gaw kanu a hkam kaja ai lam hpe jep yu nna n-gun atsam nrawng ai rai yang gaw, mungdu ni hkyem sa jaw ai hte ma hpe mahtang shangai la na ahkang jaw kau ma ai. Ndai ma hte kanu hpe Karai Kasang makawp maga ya u ga kyu hpyi ya ga ai. Dai shana de nan mare kaw nna myu tsi rung kaba de ma hkum hpe madun na matu yu wa mat masai. Ma kanu a lam hpa shiga mung bai nna lu saga ai.

Shinggyim masha langai a asak wenyi manu dan ai lam hpe Madu Yesu asan sha sharin ya sai. Mk 8:36 hta, masha gaw mungkan ting hpe Madu da nna tinang asak wenyi sum mat ai rai yang hpa baw akyu nnga ai lam sharin ya sai. Shinggyim masha langai hta rawng ai asak hte wenyi hpe, anhte gade daram manu shadan nga ga ai kun? Mungkan masha nkau gaw shinggyim masha a asak wenyi hpe gun rai langai zawn masat chye ma ai. Nkau gaw, du sat langai zawn sha manu masat da ma ai. Masha gaw tinang manu masat ai hte maren manu mung dau hte hta byin wa ai. Yesu sharin ya ai hta,

1. Anhte a hkum hkrang kata hta wenyi hte asak ngu ai lahkawng rawng nga ai (N.N 2:7).
2. Dai asak wenyi hpe mungkan ting hte pyi galai la n mai hkra manu dan ai lam Mungga hta tsun ai.(Mk 8:36)
3. Masha gaw Karai manu shadan ai hpe chye manu shadan ra ai. Shinggyim masha ni gaw, Karai manu shadan ai hpe gaw manu nshadan ai sha Karai manu nshadan ai hpe mahtang gaw grai manu shadan chye ga ai. Madu Yesu gaw anhte a asak wenyi hpe manu shadan da ai rai yang, anhte mung anhte a wenyi hpe manu shadan nna ndai wenyi lani mi wan ngarai de nsa ra hkra, wenyi a hkyehkrang la hkrum na lam hpe ahkyak da chye ra ai.
4. Madu Yesu gaw wenyi manu dan ai hpe sha sharin ya ai n rai. Ndai wenyi hkye hkrang la hkrum na lam hpe mung shi nan hkyen lajang da ya sai. (Yh 14:6) hta Yesu gaw ngai gaw lam re. Tengman ai hte asak mung re. Ngai hpe kam sham ai wa gaw hten bya nhkrum ai sha htani htana asak hpe lu la ai (Yn 3:16, 47).
**Myit yu na lam : Htawm hpang prat a matu na a asak wenyi shim la lu la sai kun?