DR. OLA HANSON

Sara Kaba Dr. Ola Hanson a Labau Kadun

Shi a asak 16 ning myit malai lu nna galai shai wa ai aten kaw na nan, magam hta shang lawm na matu Karai a shaga la ai lam hpe hkam sha sai. Dai ni Bethel Seminary ngu shamying tawn ai Chyum laika dakkasu hta mungga sharin hkam la sai. Dai hpang dai aten hta First Swedish Hkalup Hpung (ya dai ni Bethlehem Hpung) mying ai hpung hta 1890 ning June hta e lata mara hkam la nhtawm sasana a matu magam shatsam ai lam hkam la sai.

Rev. Ola Hanson hte mama gaw 1890 hta American Hkalup Maigan Sasana hpung a sasana magam gun hku nna Wunpawng Jinghpaw ni hpe kabu gara shiga hkaw tsun na shatsam ai hpe hkrum nhtawm dai shaning December shata hta Wunpawng bu ga de du wa ma sai. Dai aten na Jinghpaw amyu sha ni hpe masha nhprang madang hku sha sawn tawn ma ai. Shan a matu yak hkak ai lam law la nga ai. Myen hkawhkam wa pyi, Jinghpaw ni kaw sasana shang na sara ni hpe, Jinghpaw ni hpe laika sharin ya na hta nye hkaw na gwi ni hpe sharin ya ai pyi loi na re nga tsun lai wa sai re.

Sara Kaba Hanson gaw Jinghpaw ga si ga hkaw ni hpe hkaja hpang sai. Nsen nyem tsaw law la ai Jinghpaw ga hpe lu hkaja na matu Jinghpaw ni ga shaga ai shaloi n-gup hte shinglet shamu shamawt ai hpe ayak ahkak hkan yu let shakut lai wa sai. Jinghpaw ga si ga hkaw 25,000 hpe lu tam sawk hkaja mahkawng sai. Dai hpang ga si ga hkaw 11,000 rawng ai lachyum hpaw laikabuk (Kachin-English Dictionary) hpe lu ka lajang dip shapraw sai.

1911 ning June shata 28 ya shani hta Ga Shaka Nnan ga gale ngut sai. Dai hpe masum lang tup bai kahtap hti jep yu nhtawm Ga Shaka Dingsa daw bai ga gale sai. Shawa shakawn mahkawn 400 hpe English hte Swedish mahkawn mangoi kaw nna ga gale sai. Kaga shawa shakawn mahkawn 200 hpe mung Jinghpaw sha ni a matu manu hkra ka lajang tawn sai. Jinghpaw laika hte kaga Jinghpaw ni hte seng ai laika law law mung ka lajang dip shabra sai.

1926 ning August shata 11 ya shani Ga Shaka Dingsa daw hpe ga byan gale ai lam ngut sai. Dai ngut la lu ai shani jang mama hte ga gale garum ai kaga Jinghpaw sara ni hpe shaga la let hput di nna chyeju shakawn akyu hpyi ap nawng sai. August 14, 1926 hta ka ai shi a laika hta Jinghpaw Chyum Laika hte seng nna ndai zawn ka da nga ai:

"It is with heartfelt gratitude that I lay this work at the feet of my Master. I am conscious of the defects of my work. I have tried to master Kachin, and make a translation intelligible to all. Pray with us, that our Divine Master may bless this work to the salvation of the whole Kachin race, while we are still at work here."

(1927 ning March 27 ya shani shi ga gale tawn ai Jinghpaw chyum laika hpe Wunpawng Jinghpaw sha ni a lata de tara shang, shaman ga dagam ga hte hkrak rai jaw ap ya sai re.)