Mung chying sha kaja byin tai mayu yang Hkristan tai ra ai ngu gaw ntsun mayu nngai. Rai tim, Karai a mungga hte maren asak hkrung ai Hkristan langai gaw mung chying sha kaja rai na re ngu nna tsa lam shadang tup hkrak lu tsun nga ai.

      Karai hpe kam hpa ai wa hta, Karai a nhtoi ngu ai Shi hta rawng ai nsam atsam ni hpe kanan shapraw ai lam nga na re. Dai zawn kanan shapraw ai a marang e shi hta, tinang hkum hpe hkungga ai lam, tara hkungga ai lam, teng man ai hpe ra sharawng ai lam, tsaw ra myit hpe madung dat ai lam, kaga wa hpe tinang hkum hte maren tsaw ra lu ai lam zawn re ai myit nsam ni nga na re. Ndai lam ni gaw ngang grin ai, ngwi pyaw simsa ai uhpung uhpawng gaw gap lu na matu nnga nmai ahkyak ai nsam atsam ni rai nga ai.

     Karai hpe kam hpa ai, Karai a mungga hpe madat mara ai mung chying sha kaja law law a kasi hpe Chyum Laika hta mu lu ga ai. Dai ni hta e nkau mi gaw yu maya mung chying sha kaja sha nrai, mung a ningbaw ningla ni nan rai ma ai. Ga shadawn, mungkan a labau hta mying gumhkawng lai wa sai Babelon mung hta mung up madang hta e lit la lai wa sai Daniela hpe yu ga. Hkaw hkam wa hta lai shi daram arawng aya kaba ai Babelon mung hta nnga sai. Hkaw hkam wa e kam ging ai, amu kaba jum ging ai, mung shawa masha hpe akyu jaw ai, kaga masha ni hpe kasi kaja madun ai wa rai nga ai. Kaga kasi langai gaw Yosep rai na re. Karai hpe kam hpa ai lam, sadi dung ai lam ni a majaw Egutu, Hpara-u hkaw hkam a lawu hprut mung up du byin wa sai. Karai hpe hkrit hkungga ai a marang e dinghku num langai mi shi hpe gung lau wa ai shaloi shut hpyit ai lam hpe koi yen sai. Yosep zawn Karai hpe kam hpa hkrit hkungga ai masha gaw mung chying sha kaja nan rai sai.

      Dai ni mungkan mungdan shagu a up hkang ai madang hta Yosep zawn re ai masha grai ra kadawn nga ai. Dai ni na mungdan ni a up hkang ai madang hta hpa baw mang hkang ni byin pru nga a ta? N-gun ja ai ni nlaw nla re ai ni hpe dip rip ai, npu na wa hpe kabye nna ntsa na wa hpe pawn da mayu ai, mayun kum hpa sha ai, tingyeng akyu pru na rai yang kaga ni a akyu ndaw ai, lu ai ahkaw ahkang hpe manang wa a matu pyi n ngam da ai sha magra la mayu ai, ga sadi n dung ai lam zawn re ai ni rai nga ai. Yawn hpa langai gaw, Hkristan mying gun ai ni, ndai lam ni hta kaga masha hte nau wa n shai ai hku asak hkrung ai lam nan rai sai. Egutu hte Babelon zawn re ai, Karai hpe nchye ai mungdan kaba ni pyi, Karai hpe hkrit hkungga ai Yosep hte Daniela zawn re ai ni hpe ra sharawng ma, shanhte a kang ka sadi sahka ai lam a akyu mung hkam la lu ma ai. Dai ni nang ngai, Daniela hte Yosep zawn tinang hte seng ai uhpung uhpawng hta kang ka sadi sahka let Karai a nsam ningja hpe shapraw lu ai mung chying sha kaja tai nga ga ai kun? Myit yu ga saw shaga dat nngai.

Bai matut na.